Azərbaycan Respublikasında idman siyasətinin uğurla həyata keçirilməsi, gənclərin fiziki inkişafının təmin olunması və sağlam həyat tərzinin təşviqi istiqamətində həyata keçirilən tədbirlər sırasında mühüm yer tutan növbəti mötəbər idman hadisəsi – “Combat Peşəkar Döyüş Liqası”nın “Qala Gecəsi” 14 aprel 2026-cı il tarixində paytaxt Bakı şəhərində yüksək səviyyədə təşkil olunaraq uğurla başa çatmışdır.

Arpaçay İdman Birliyinin təşkilatçılığı və Azərbaycan Kung-Fu Federasiyasının dəstəyi ilə keçirilən bu nüfuzlu tədbir ölkəmizdə döyüş idman növlərinin inkişafına verilən önəmin bariz nümunəsi olmaqla yanaşı, peşəkar idman mühitinin formalaşdırılması və beynəlxalq standartlara uyğun idman yarışlarının təşkili baxımından əhəmiyyətli platforma kimi çıxış etmişdir.

Tədbir Azərbaycan Respublikasının Dövlət Himninin səsləndirilməsi ilə rəsmi şəkildə açıq elan olunmuş, daha sonra Ümummilli Lider Heydər Əliyevin və Azərbaycan Respublikasının müstəqilliyi, suverenliyi və ərazi bütövlüyü uğrunda canlarından keçmiş qəhrəman şəhidlərimizin əziz xatirəsi dərin ehtiramla bir dəqiqəlik sükutla yad edilmişdir.

Rəsmi açılış mərasimində çıxış edən “Combat Peşəkar Döyüş Liqası”nın prezidenti Ruslan Məmmədov Azərbaycan Respublikasında idman sahəsində əldə olunan uğurlardan bəhs etmiş, dövlət başçısı cənab İlham Əliyevin rəhbərliyi ilə həyata keçirilən idman siyasətinin ölkəmizin beynəlxalq idman arenasında mövqeyinin möhkəmlənməsinə mühüm töhfə verdiyini diqqətə çatdırmışdır. O, eyni zamanda qeyd etmişdir ki, bu kimi tədbirlər gənclərin idmana cəlb olunması, peşəkar idmançıların yetişdirilməsi və sağlam həyat tərzinin təşviqi baxımından xüsusi əhəmiyyət daşıyır. Çıxışının sonunda idmançılara uğurlar arzulayan Ruslan Məmmədov tədbirin ərsəyə gəlməsində əməyi olan bütün tərəfdaşlara və təşkilatçılara təşəkkürünü bildirmiş, yarış çərçivəsində idmançıların çempionluq kəməri, kubok və 20 000 (iyirmi min) manat məbləğində mükafat fondu uğrunda mübarizə apardıqlarını vurğulamışdır.

Tədbirdə Azərbaycan Respublikasının Milli Məclisinin deputatları, dövlət və ictimaiyyət nümayəndələri, eləcə də dünya və Avropa miqyasında uğurlar qazanmış tanınmış idmançılar iştirak etmiş, bu mötəbər idman gecəsinə xüsusi nüfuz və ictimai əhəmiyyət qazandırmışlar. Onların iştirakı gənc idmançılar üçün əlavə motivasiya mənbəyi olmaqla yanaşı, idmanın cəmiyyət həyatında oynadığı mühüm rolu bir daha nümayiş etdirmişdir.

Azərbaycan Kung-Fu Federasiyasının prezidenti Nurlan Aslanov çıxışında yarışın təşkilati səviyyəsi, idmançıların hazırlıq prosesi, hakimlik sistemi və tədbirin ümumi əhəmiyyəti barədə geniş məlumat vermiş, bu cür peşəkar yarışların ölkədə döyüş idman növlərinin inkişafına mühüm təkan verdiyini qeyd etmişdir.

“Qala Gecəsi” çərçivəsində təşkil olunan döyüşlər yüksək peşəkarlıq və rəqabət şəraitində keçirilmişdir. Ümumilikdə 6 döyüş üzrə 12 peşəkar idmançı rinqə çıxaraq öz fiziki hazırlıq səviyyələrini, texniki bacarıqlarını və döyüş strategiyalarını nümayiş etdirmişlər. Qarşılaşmalar tamaşaçılar tərəfindən böyük maraq və coşqu ilə izlənilmiş, hər bir döyüş yüksək idman ruhu və prinsipial mübarizə ilə yadda qalmışdır.

Yarışın yekun nəticələrinə əsasən qalib idmançılar çempionluq kəməri, kubok və müvafiq pul mükafatları ilə təltif olunmuşlar. Tədbirin bədii hissəsi çərçivəsində təqdim edilən musiqili və rəqs proqramları isə ümumi təşkilati səviyyəni daha da zənginləşdirərək gecəyə xüsusi estetik çalar qatmışdır.

Tədbirin sonunda Arpaçay İdman Birliyinin I vitse-prezidenti Yavər Hüseynov Birliyin prezidenti Əli Əsərovun adından çıxış edərək idmançılara, təşkilatçılara, tərəfdaş qurumlara və bütün iştirakçılara təşəkkürünü bildirmiş, bu cür mötəbər idman layihələrinin gələcəkdə də davamlı olaraq həyata keçiriləcəyini diqqətə çatdırmışdır.

Qeyd edilməlidir ki, “Combat Peşəkar Döyüş Liqası”nın “Qala Gecəsi” ölkəmizdə idman sahəsində aparılan məqsədyönlü dövlət siyasətinin uğurlu nəticələrindən biri olmaqla yanaşı, gənclərin idmana marağının artırılması, sağlam həyat tərzinin təşviqi və Azərbaycanın idman ölkəsi kimi beynəlxalq nüfuzunun daha da gücləndirilməsi baxımından mühüm əhəmiyyət kəsb edir.