Yunan-Roma və sərbəst güləş üzrə Azərbaycan çempionatı gərgin və maraqlı mübarizə şəraitində davam edir. Yarışın ikinci günündə yunan-Roma güləşi üzrə 5 çəki dərəcəsində medalçıların adlarına aydınlıq gətirilib.
Urbaninfo.az xəbər verir ki, güləşçilər 55, 63, 72, 82 və 97 kq çəki dərəcələrində xalça üzərinə çıxaraq ölkə çempionluğu uğrunda mübarizə aparıblar. Günün yekununda hər çəkidə ilk üç yeri tutan idmançılar müəyyənləşib.
55 kq çəki dərəcəsində “Neftçi” klubunun təmsilçisi Elmir Əliyev bütün rəqiblərinə qalib gələrək qızıl medal qazanıb. Gümüş medala Rəşad Məmmədov (“Neftçi”, Şəmkir) sahib çıxıb. Bürünc medallar isə Fərid Sadıxlı və İbrahim Nurullayevə (hər ikisi “Neftçi”) verilib.
63 kq çəki dərəcəsində çempionluq sevinci Ziya Babaşovun (“Neftçi”) olub. Finalda məğlub olan Sakit Quliyev (“Neftçi”) ikinci yerlə kifayətlənib. Üçüncü yeri isə Pərviz Dadaşov (MOİK) və Səid Xəlilov (Sumqayıt-Təhsil, “Neftçi”) bölüşüblər.
72 kq çəki dərəcəsində Fəraim Mustafayev (“Neftçi”) fəxri kürsünün ən yüksək pilləsinə qalxıb. Gümüş medal Xalid Həsənova (“Neftçi”) qismət olub. Bürünc mükafatları isə Rəsul Məmmədzadə (MOİK) və Seymur Qasımov (“Neftçi”) əldə ediblər.
82 kq çəki dərəcəsində çempion adını Tuncay Vəzirzadə (“Neftçi”) qazanıb. İkinci yerin sahibi Elmin Əliyev (MOİK, Lənkəran) olub. Üçüncü yerləri Kənan Abdullazadə (MOİK) və Nicat Yeylaqaliyev (Abşeron) tutublar.
Günün son çəkisi olan 97 kq-da isə Murad Əhmədiyev (“Neftçi”) bütün görüşlərini qələbə ilə başa vuraraq qızıl medal qazanıb. Gümüş medal Məhəmməd Əhmədiyevə (“Neftçi”) nəsib olub. Bürünc medalları Arif Niftullayev və Əli Quliyev (hər ikisi “Neftçi”) əldə ediblər.
Qeyd edək ki, Azərbaycan çempionatı növbəti günlərdə də davam edəcək və digər çəki dərəcələri üzrə qaliblərin adları bəlli olacaq.