Hörmətli ADY QSC sədri cənab Rövşən Rüstəmov,

Bakı–Tbilisi reysinin bərpası ətrafında son günlər yaşanan kommunikasiya böhranı ilə bağlı ictimai maraqları müdafiə edən media nümayəndəsi kimi bir sıra ciddi sual və narazılıqlarımı diqqətinizə çatdırmaq istəyirəm.

Təəssüf ki, strateji əhəmiyyət daşıyan və ictimai maraq doğuran Bakı–Tbilisi reysinin açılışı ADY-nin İctimaiyyətlə Əlaqələr komandası tərəfindən peşəkar kommunikasiya nümunəsinə deyil, əksinə kritik böhran həddinə çatdırıldığı uğursuz PR nümunəsinə çevrildi.

Sosial şəbəkədə yayılan linkləri paylaşaraq ilk sərnişinin ADY əməkdaşı olmasını yazmışdım. Həmin statusuma “Facebook” sosial şəbəkəsində 60 mindən çox baxış olub və görüntüləri məktuba əlavə edirəm.
https://www.facebook.com/share/p/1D6raqYZzB/


Normal kommunikasiya xidməti olan qurumlarda xəbər yanlış olarsa, qurumun sözçüsü məlumatı yayan şəxsə və ya paylaşımın rəy bölməsinə operativ şəkildə düzgün məlumat təqdim edir. Sizin əməkdaşlar isə “Ayıbdır” yazmaqla "peşəkar səviyyələrini" ortaya qoydular. Unudulmamalıdır ki, hər sözçü təmsil etdiyi qurumun simasıdır.

Əgər “ilk sərnişin” kimi təqdim olunan xanım əməkdaş barədə yayılan məlumat yanlış idisə, niyə ADY-nin Mətbuat Katibliyi bu qədər gec reaksiya verdi?

Mövzu sosial şəbəkələrdə və media resurslarında geniş tirajlandığı halda, təkzib və ya izah niyə 2-3 gün sonra, məhz auditoriya aktivliyinin aşağı olduğu şənbə günü verildi? Operativ kommunikasiya niyə həyata keçirilmədi?

Digər məsələ ADY əməkdaşı Pərviz Sadıqovun sərnişin kimi paylaşımı və onun etikadan kənar cavabı ilə bağlıdır.

Pərviz Sadıqov və ətrafı mənə cavabında özünü “ADY-nin siması” kimi təqdim edir. Lakin istiqaməti bəlli olmayan qatarın qarşısında tək dayanaraq, əlində çemodan və gün eynəyində təqdim olunan şəxsin PR xarakterli fotosu ADY-yə və bilet satışına hansı müsbət töhfəni verir?

Əgər həmin vaxt real sərnişin yox idisə və “arxiv üçün foto” çəkilibsə, o halda niyə neytral, informativ və sərnişin yönümlü vizuallar hazırlanmadı? Üstəlik, görüntülərdə “Bakı–Tbilisi” qeydinin belə olmaması bu paylaşımın ictimai informasiya baxımından məqsədini daha da sual altına salır.

Hər gün Bakı Dəmiryol Vağzalından yüzlərlə insan istifadə edir. İnsan axını, sərnişin təcrübəsi və real atmosfer üzərindən peşəkar kommunikasiya qurmaq mümkün olduğu halda niyə şəxsi təqdimat görüntülərinə üstünlük verildi?

Bütün bu böhranın formalaşmasında ADY-nin Mətbuat Katibliyinin birbaşa məsuliyyəti olduğu açıq görünür.

Media və sosial şəbəkələrdə yayılan xəbərlərin vaxtında izlənməməsi, suallara operativ cavab verilməməsi, natamam və hissə-hissə açıqlamalar verilməsi vəziyyətin daha da böyüməsinə səbəb oldu.

Daha narahatedici məqamı diqqətinizə çatdırmaq istəyirəm:

Niyə mənim paylaşımımdan sonra ADY əməkdaşları Bəxtiyar Hacıyev, Pərviz Sadıqov, Fuad Şahbazov və Müşviq Mehdiyev vasitəsilə şərh bölməsində Azərbaycan Respublikası Prezidentinin Sərəncamı ilə təsis edilən “Medianın 150 illiyi münasibətilə” medalı ilə təltif olunmuş jurnalistə, Media Reyestrindən keçən və dövlətə vergi ödəyən sayt rəhbərinə normal cavab vermək əvəzinə “Ayıbdır” ifadəsi yazıldı?

Halbuki onların maaşı da dövlət büdcəsi və mənim kimi vətəndaşların ödədiyi vergilər hesabına formalaşır.

Bu davranış korporativ etikaya, dövlət qurumu əməkdaşının davranış kodeksinə və ictimai kommunikasiya prinsiplərinə nə dərəcədə uyğundur?

Məhz ictimai təzyiqdən və təkidli suallardan sonra şənbə günü axşam “İnsanoid” səhifəsində ilk bilet alan xanımın ADY əməkdaşı olmadığı barədə açıqlama verildi. Elə həmin gün vəziyyətin böyüdüyünü görən Mətbuat katibi Bəxtiyar Hacıyev tələsik şəkildə bəzi media resurslarına təkzib xarakterli məlumat ötürdü.

Daha sonra isə bazar günü “WhatsApp” statusunda saat 13:00-a qədər telefonunun bağlı olacağını yazaraq ictimaiyyətə mesaj verdi.

Böhran vəziyyətində olan dövlət şirkətinin mətbuat katibinin ictimai suallardan yayınan görüntü yaratması nə dərəcədə doğrudur?

Digər ciddi problem Gürcüstana gedəcək qatarlarla bağlı infoturun təşkilində yaşandı.

Jurnalistlərə 20 may tarixində səhər saat 07:30-da “WhatsApp” üzərindən tələsik mesaj göndərilərək Bakı Dəmiryol Vağzalına infotura dəvət edilməsi peşəkar media planlaması sayıla bilməz.

Xüsusilə qeyd etmək istəyirəm ki, həmin günlərdə jurnalistlərin bir qismi WUF13 Azerbaijan çərçivəsində keçirilən beynəlxalq tədbirlərin işıqlandırılmasına təhkim olunmuşdu. Belə bir vaxtda media nümayəndələrinə son anda, səhər saatlarında koordinasiyasız şəkildə mesaj göndərilməsi media ilə münasibətlərin planlı və peşəkar şəkildə qurulmadığını göstərir.

Üstəlik, jurnalistlərə əvvəlcədən geniş məlumat təqdim edilmədi, proqram paylaşılmadı, sual ünvanlaya biləcəyimiz məsul şəxslərlə açıq format təşkil olunmadı.

Halbuki həmin infotur çərçivəsində SD və rəqəmsallaşma xidməti rəhbərliyi ilə görüş təşkil edilə, aşağıdakı məsələlərə aydınlıq gətirilə bilərdi:

— qiymət siyasəti;
— dinamik tarif sistemi;
— mobil tətbiqin fəaliyyəti;
— rəqəmsallaşma problemləri;
— onlayn bilet satışındakı texniki çətinliklər;
— sərnişin axınının idarə olunması.

Əgər vaxtında normal brifinq keçirilsəydi, bu qədər informasiya boşluğu və dezinformasiya yaranmazdı.

Əvəzində isə vətəndaşların haqlı narazılıqlarını səsləndirən jurnalistlərə qarşı aqressiv münasibət sərgiləndi və ictimai tənqid emosional reaksiyalarla qarşılandı.

İndi isə aqressiv sözçünüzün və komandasının etikadan kənar davranışlarına tuş gəlməmək üçün sizə aşağıdakı sualları ünvanlayıram:

1. Niyə Bakı–Tbilisi reysi ilə bağlı məlumatı Azərbaycan ictimaiyyəti ilk olaraq Gürcüstan mediasından öyrənməli oldu?

2. Niyə bu xəbəri əvvəlcədən ADY və ya AZCON paylaşmadı?

3. Niyə məsələyə sonradan İqtisadiyyat Nazirliyi aydınlıq gətirməli oldu?

4. İki dövlət arasında danışıqlar və hazırlıq prosesi getdiyi halda niyə bilet satışı başlayan günlərdə ADY-nin mobil tətbiqi işləmədi?

5. Niyə kassaların qarşısında uzun növbələr yarandı?

6. Niyə çağrı mərkəzi vətəndaşa “81 AZN-lik bilet almaq üçün 25-30 gün əvvəl sifariş vermək lazım idi” cavabı verir, halbuki reysin açılması cəmi bir neçə gün əvvəl rəsmi elan olunub?

7. Premium qatarla yanaşı daha münasib qiymətli, köhnə vaqonların modernizasiyası yolu ilə alternativ variant yaratmaq olmazdımı ki, aşağı gəlirli vətəndaşlar da bu marşrutdan istifadə edə bilsin?

Təəssüf ki, ADY-nin yarıtmaz PR və ictimaiyyətlə əlaqələr komandası böyük ictimai maraq doğuran bir layihəni kommunikasiya uğuruna deyil, idarəolunmayan informasiya böhranına çevirdi.

Ümid edirəm ki, bu suallar cavabsız qalmayacaq və ADY rəhbərliyi strateji əhəmiyyətli bir qurumun ictimaiyyətlə əlaqələr siyasətinə ciddi və tələbkarlıqla yenidən baxacaq.

Hörmətlə,
Elnurə Abuşova