Azərbaycan Xarici İşlər Nazirliyi Gürcüstan Patriarxlığının Azərbaycanın ərazisində yerləşən Kürmük məbədi ilə bağlı son açıqlamasına münasibət bildirib.

Nazirlik hesab edir ki, sözügedən açıqlama Azərbaycan və Gürcüstan arasında mövcud olan dostluq, tərəfdaşlıq və mehriban qonşuluq münasibətlərinin ruhuna uyğun deyil.

XİN vurğulayıb ki, Azərbaycanın ərazisində yerləşən coğrafi və tarixi toponimlərin başqa adlarla təqdim olunması qəbuledilməzdir. Azərbaycan tərəfi indiyədək Gürcüstanın ərazi bütövlüyü və suverenliyinə hörmətlə yanaşıb və eyni yanaşmanın Gürcüstan tərəfindən də nümayiş etdirilməsinin iki ölkə arasında formalaşmış strateji tərəfdaşlığın əsas prinsiplərindən biri olduğu qeyd edilib.

Nazirlik Gürcüstan Patriarxlığının Azərbaycanın ərazi bütövlüyü və suverenliyinə münasibətdə ərazi iddiaları ehtiva edən yanaşmasının anlaşılmaz olduğunu bildirib.

Bəyanatda dini qurumlara Azərbaycan və Gürcüstan xalqları arasında əsrlər ərzində formalaşmış dostluq və mehriban qonşuluq əlaqələrinə xələl gətirə biləcək addımlardan çəkinmək çağırışı da edilib.

XİN, həmçinin Ermənistan kilsəsinin məlum yanaşmalarının təkrarlanmasının və onun yolunun davam etdirilməsinin məqsədəuyğun olmadığını vurğulayıb.

Nazirlik qeyd edib ki, Azərbaycan ərazisində yerləşən bütün tarixi, mədəni və dini abidələr Azərbaycan xalqının və dövlətinin milli irsinin ayrılmaz hissəsidir.