Milli Məclisin Xarici müdaxilələrə və hibrid təhdidlərə qarşı müvəqqəti komissiyası son günlər Türkiyə ərazisindən sosial media platformaları vasitəsilə Azərbaycana qarşı aparıldığı bildirilən informasiya kampaniyasını araşdırıb. Komissiyanın monitorinqləri zamanı kampaniyanın müxtəlif sosial media hesabları və hədəfli reklamlar vasitəsilə koordinasiyalı şəkildə həyata keçirildiyi müəyyənləşdirilib.

Komissiyanın məlumatına görə, sözügedən kampaniyanın əsas məqsədlərindən biri Azərbaycan-Türkiyə münasibətlərinə kölgə salmaq, ictimai rəydə çaşqınlıq yaratmaq, vətəndaşların dövlət institutlarına inamını sarsıtmaq və cəmiyyətdə qarşıdurma yaratmaqdır.

Açıqlamada diqqətə çatdırılıb ki, bu fəaliyyətlərdə həm real, həm də saxta sosial media hesablarından istifadə olunur. Komissiya həmçinin qeyd edib ki, “bir millət, iki dövlət” prinsipi əsasında inkişaf edən Azərbaycan-Türkiyə münasibətlərinə zərər vurmağa yönələn belə kampaniyalara bəzi vətəndaşların da fərqinə varmadan dəstək verməsi müşahidə olunur.

Komissiya kampaniyada iştirak etdiyi müəyyən edilən şəxslər və şəbəkələr barədə məlumatların Azərbaycanın aidiyyəti dövlət qurumlarına təqdim ediləcəyini bildirib. Eyni zamanda, Türkiyə qanunvericiliyində bu xarakterli fəaliyyətlərə görə hüquqi məsuliyyət nəzərdə tutulduğu xatırladılıb.

Müvəqqəti komissiya vətəndaşları, eləcə də Türkiyədə yaşayan azərbaycanlıları və qardaş ölkənin ictimaiyyətini sosial şəbəkələrdə yayılan məlumatlara daha diqqətlə yanaşmağa, mənbəni yoxlamadan informasiyanı paylaşmamağa və saxta xəbərlərin təsirinə düşməməyə çağırıb.

Azərbaycan və Türkiyənin informasiya məkanında dezinformasiyaya qarşı əməkdaşlığın gücləndirilməsi də son dövrdə gündəmdədir. İki ölkənin aidiyyəti qurumları 2026-cı ildə media və rəqəmsal platformalarda dezinformasiyaya qarşı birgə fəaliyyət imkanlarını genişləndirmək barədə razılaşma əldə ediblər.