Putin: “Ümid edirəm, Rusiya ilə Avropa arasındakı böhran bir gün sona çatacaq”
Rusiya Prezidenti Vladimir Putin Rusiya ilə Avropa arasında yaranmış böhranın nə vaxtsa geridə qalacağına ümid etdiyini bildirib.
Putin bu fikirləri Şanxay Əməkdaşlıq Təşkilatının (ŞƏT) sammiti çərçivəsində Ermənistanın Baş naziri Nikol Paşinyanla görüşü zamanı səsləndirib.
Rusiya lideri Avropa ölkələri ilə münasibətlərin nisbətən normal olduğu dövrlərdə belə tərəflərin bir sıra məsələlər üzrə kompromis əldə etməyə çalışdıqlarını, lakin bu cəhdlərin nəticəsiz qaldığını deyib.
Putinin sözlərinə görə, avropalılar danışıqlarda kifayət qədər sərt və güzəştə getməyən mövqe nümayiş etdirirlər. Bu səbəbdən də tərəflər keçmişdə bir çox məsələlərin həllinə nail ola bilməyiblər.
Bununla belə, Rusiya Prezidenti hesab edir ki, gələcəkdə Moskva ilə Avropa arasında dialoqun bərpası zəruri ola bilər. O, bunun həm Rusiya, həm də Avropa iqtisadiyyatının fundamental maraqları və müəyyən sahələrdəki qarşılıqlı tamamlayıcılıqla bağlı olduğunu vurğulayıb.
“Ümid edirəm ki, bütün bu böhranlı hallar nə vaxtsa sona çatacaq”, – Putin bildirib.
Qeyd edək ki, Kremlin sözçüsü Dmitri Peskov daha əvvəl Avropanın Rusiyaya münasibətinin mənfi olmasının səbəbləri barədə danışarkən, bəzi avropalı siyasətçilərin ölkələrinin öz problemlərinə görə məsuliyyəti Rusiya kimi böyük bir dövlətin üzərinə qoymağa çalışdığını və Avropada bir növ “tarixi revanş” istəyinin mövcud olduğunu bildirmişdi.
