Prezident İlham Əliyevin təsdiqlədiyi Əmək Məcəlləsinə dəyişiklikləri nəzərdə tutan Qanun işçilərin işdən kənarlaşdırılması ilə bağlı halların siyahısını genişləndirib.
Dəyişikliklər işəgötürənə mülkiyyətçinin və işçilərin maraqlarının qorunması, əməyin mühafizəsi qaydalarının pozulmasının qarşısının alınması və əmək intizamının təmin edilməsi məqsədilə əlavə səlahiyyətlər verir.
Yeni qaydalara əsasən, işəgötürən aşağıdakı hallarda işçini müvafiq iş vaxtı ərzində işdən kənarlaşdıra biləcək:
icbari tibbi müayinənin nəticələrinə əsasən işçinin əmək funksiyalarını yerinə yetirməsinə əks göstərişlər aşkar edildikdə;
əməyin mühafizəsi üzrə təlimlərdə iştirakdan və biliklərin yoxlanılmasından imtina edildikdə;
əmək vəzifələrinin pozulması ilə bağlı aparılan araşdırmaya qəsdən maneçilik törədildikdə.
Qanuna görə, işçi işdən kənarlaşdırılmasına səbəb olan hallar aradan qaldırılanadək bu statusda qala bilər. İşdən kənarlaşdırılma müddəti isə hər bir konkret vəziyyətin xarakteri, həmin səbəbin aradan qaldırılıb-qaldırılmaması və işçinin davranışları nəzərə alınmaqla işəgötürən tərəfindən müəyyən ediləcək.
Bununla yanaşı, işəgötürən işçinin işdən kənarlaşdırılması barədə verilmiş əmr, sərəncam və ya qərarı zərurət yarandıqda vaxtından əvvəl ləğv etmək hüququna malik olacaq.
Urbaninfo.az