Prezident İlham Əliyevin 2026-cı ili Azərbaycanda “Şəhərsalma və Memarlıq İli” elan etməsi ölkədə bu sahədə son illər həyata keçirilən genişmiqyaslı quruculuq və institusional islahatların məntiqi davamı kimi qiymətləndirilir. Bu qərar xüsusilə 2026-cı ilin mayında Bakıda keçiriləcək Ümumdünya Şəhərsalma Forumunun 13-cü sessiyası (WUF13) fonunda strateji əhəmiyyət daşıyır.
WUF13-ün Bakıda təşkili Azərbaycanın şəhərsalma sahəsində beynəlxalq etimad qazandığını göstərir. Son illər ölkədə yeni şəhər və kəndlərin salınması, Qarabağ və Şərqi Zəngəzurda genişmiqyaslı bərpa-quruculuq işlərinin aparılması, “ağıllı şəhər” və “ağıllı kənd” konsepsiyalarının tətbiqi Azərbaycanın müasir urbanistika modelini formalaşdırdığını nümayiş etdirir. Bu model dayanıqlılıq, rəqəmsallaşma, enerji səmərəliliyi və ekoloji yanaşmaları birləşdirir.
Forumun əsas məkanı Bakı Olimpiya Stadionu olacaq. Tədbir üçün on minlərlə kvadratmetr sahəni əhatə edən konfrans zalları və infrastruktur yaradılır. WUF13 çərçivəsində təşkil olunacaq “Urban Expo” sərgisi isə şəhərsalma, memarlıq, dayanıqlı inkişaf və innovativ həllər sahəsində qlobal təcrübələrin paylaşılması üçün geniş platforma rolunu oynayacaq. Tədbirin beynəlxalq ISO20121 davamlı tədbir standartına uyğun keçirilməsi planlaşdırılır ki, bu da ətraf mühitə təsirin minimuma endirilməsini və sosial-iqtisadi faydanın artırılmasını hədəfləyir.
Forumun təşkili zamanı nəqliyyat, təhlükəsizlik və insan axınının idarə olunmasına xüsusi diqqət yetirilir. Bakı şəhəri üzrə nəqliyyat “hub”ları müəyyənləşdirilib, hava limanı, otellər, şəhər mərkəzi və forum məkanı arasında əlaqələndirilmiş marşrutlar planlaşdırılıb. Azərbaycanın COP29 kimi iri beynəlxalq tədbirlərə uğurla ev sahibliyi etməsi WUF13 üçün möhkəm təşkilati baza formalaşdırıb.
WUF13 Azərbaycan üçün təkcə beynəlxalq imic baxımından deyil, uzunmüddətli şəhər siyasəti nöqteyi-nəzərindən də mühüm fürsətdir. Forum ölkənin şəhərsalma strategiyasının BMT-nin Yeni Şəhər Gündəliyi və 2030-cu ilədək dayanıqlı inkişaf məqsədləri ilə uzlaşdırılmasına, innovativ yanaşmaların tətbiqinə və investisiya imkanlarının genişlənməsinə təkan verəcək.
Birsözlə, “Şəhərsalma və Memarlıq İli – 2026” və WUF13 Azərbaycanın regional urbanistika mərkəzi kimi mövqeyini möhkəmləndirməklə yanaşı, ölkəni dayanıqlı, ağıllı və gələcəyə yönəlik şəhər inkişafı modellərinin qlobal müzakirə platformasına çevirir.

Urbaninfo.az