Türkiyənin Xarici İşlər naziri Hakan Fidan TRT-yə açıqlamasında bildirib ki, hazırkı mərhələ Ukrayna münaqişəsi üzrə sülh razılaşmalarına nail olmaq baxımından əvvəllər olduğundan daha yaxındır.
Fidan deyib:
"Biz liderlər səviyyəsində və öz səviyyəmizdə davamlı danışıqlar aparırıq. Bu səylərin nəticəsi olaraq, hazırda sülh razılaşmalarına heç vaxt olmadığı qədər yaxınlaşmışıq."
Nazir qeyd edib ki, tərəflər ideal şəkildə istənilən qədər yaxın olmasa da, Türkiyə sülh müqaviləsi imzalanacağı təqdirdə Qara dənizdə təhlükəsizliyə cavabdehlik daşımağa hazırdır.
Xatırladaq ki, daha əvvəl Bloomberg xəbər agentliyi yazmışdı ki, prezident Rəcəb Tayyib Ərdoğan Rusiyanın və Ukraynanın liderləri — Vladimir Putin və Vladimir Zelenskiy ilə birbaşa əlaqə qurmaq imkanını istisna etməyib. Ərdoğan vurğulayıb ki, Türkiyə tərəflər üçün açıq qapı siyasətini davam etdirir və bu mövqeyini münaqişə tərəflərinə dəfələrlə bildirib.