Nyu-Yorkun federal məhkəməsində Venesuela prezidenti Nikolas Maduro və həyat yoldaşı Siliya Floresin ilk iclası keçirilib. İclas zamanı Maduro özünü “Venesuelanın prezidenti” elan edib, əsassız ittihamları rədd edib və günahsız olduğunu bildirib. Flores də günahsız olduğunu bəyan edib.
Urbaninfo.az xəbər verir ki, məhkəmə hakiməsi Elvin Hellerstain hər iki tərəfə pulsuz vəkil hüququ və konsulluq nümayəndələri ilə görüşmək imkanı barədə məlumat verib. Maduro və Flores bu hüquqlardan istifadə etmək istədiklərini bildirib. Hazırda Maduro azadlıq üçün ərizə verməsə də, vəkili Barri Pollak bildirib ki, bunu sonradan edə bilər. Floresin vəkili Mark Donnelli isə onun ciddi qabırğa xəsarətləri aldığını və tibbi müalicəyə ehtiyacı olduğunu vurğulayıb.
Hər iki şəxs ABŞ-da narkoterorizm üzrə ittiham olunub: narkotik kontrabanda, narkotika terrorizmi və qanunsuz silah saxlanması ilə əlaqədar. Məhkəmə iclası Daniel Patrick Moynihan Federal Məhkəməsi binasında keçirilib. Növbəti iclas 17 mart saat 11:00-da keçiriləcək.
Məhkəmə binası ətrafında təhlükəsizlik tədbirləri gücləndirilib. Nyu-Yorkda kiçik mitinqlərdə həm Maduro tərəfdarları, həm də əleyhdarları iştirak edib. Təxminən 50 nəfər olan tərəfdarlar “Prezident Nikolas Maduro və Siliya Floresi dərhal azad edin!” və “ABŞ, Venesuelaya qarışma!” şüarları ilə etirazlarını bildiriblər.
Maduro ABŞ-da yüksək səviyyəli təhlükəsizlik şəraitində helikopter və xüsusi karvanla məhkəməyə gətirilib. Vəkillər Barri Pollak və Mark Donnelli onu və həyat yoldaşını müdafiə edirlər.