Məhsullar 2023-cü ilin oktyabrında Hayfa limanına çatdırılıb

Türkiyə ilə İsrail arasında siyasi fikir ayrılıqları davam etdiyi bir vaxtda iki ölkə arasındakı ticarət əlaqələri ilə bağlı 2023-cü ilin oktyabrına aid məlumatlar yenidən gündəmə gəlib.

İsrail mediasının məlumatına görə, 2023-cü il oktyabrın 18-də Türkiyədən Hayfa limanına 4 500 ton meyvə və tərəvəz gətirən gəmi daxil olub. Yükün təxminən 80 faizini pomidor təşkil edib. İsrail Kənd Təsərrüfatı Nazirliyi idxalın ölkədə kənd təsərrüfatı istehsalına müharibənin təsiri fonunda ərzaq təminatının qorunması məqsədilə həyata keçirildiyini açıqlayıb.

Məsələ Türkiyə–İsrail ticarət əlaqələrinin, xüsusilə də Azərbaycan neftinin Ceyhan üzərindən daşınması ilə bağlı müzakirələr fonunda diqqət çəkib.

SOCAR Türkiyə şirkəti daha əvvəl açıqlamasında SOCAR-ın neftini birbaşa İsrailə satması barədə iddiaları rədd edib. Şirkətin bildirdiyinə görə, neft ticarət şirkətləri vasitəsilə dünya bazarlarına çıxarılır və son təyinat məntəqəsinə nəzarət SOCAR-ın səlahiyyətində deyil. Türkiyənin Energetika və Təbii Sərvətlər Nazirliyi də Ceyhandan İsrailə birbaşa neft göndərilməsi barədə iddiaların əsassız olduğunu açıqlayıb.

Digər tərəfdən, 2024-cü ilin mayında İsrail Kənd Təsərrüfatı Nazirliyi Türkiyədən təzə tərəvəz idxalının həmin ilin əvvəlindən azaldığını açıqlayıb. Məlumata görə, aprel ayında Türkiyədən təxminən 70 ton pomidor idxal edilib.

Qeyd edək ki, Türkiyə 2024-cü ilin mayından İsraillə ticarəti dayandırdığını açıqlayıb. İsrail Mərkəzi Bankının məlumatına görə, bundan sonra Türkiyədən idxalın həcmi əhəmiyyətli dərəcədə azalıb.