Dubaydan Təl-Əvivə uçan və bu gün həyəcan siqnalı verən təyyarədə baş verdiyi iddia olunan insidentlə bağlı yeni görüntülər yayılıb.

Sosial şəbəkələrdə yayılan fotolardan birində ağ köynəkdə olan şəxsin üzərində qana bənzər ləkələr əks olunub. Həmin şəxsin təyyarədə bıçaqla hücum edən şəxsin zərərsizləşdirilməsinə kömək edən sərnişin olduğu bildirilir.

Digər görüntülərdə isə təyyarədə yaranan təşviş, sərnişinlərin qışqırması və təyyarənin silkələnməsi əks olunub. Kadrlarda bəzi sərnişinlərin dua etdiyi də görünür.

Lakin sözügedən görüntülərin “Flydubai”nin Dubay-Təl-Əviv reysinə məxsus təyyarədə çəkilməsi barədə məlumat hələ rəsmi təsdiqini tapmayıb.

Hadisənin səbəbləri ilə bağlı müxtəlif məlumatlar yayılıb. Bir versiyaya əsasən, pilotlar arasında mübahisə yaranıb və nəticədə onlardan biri bıçaq xəsarəti alıb. İnsidentin sərnişinlərin müdaxiləsi ilə dayandırıldığı bildirilir.

Başqa bir iddiaya görə isə insident pilotlardan birinin təyyarəni qəsdən qəzaya uğratmaq cəhdi ilə əlaqəli olub.

“Channel 12” pilotlardan birinin rusiyalı, digərinin ukraynalı olduğunu iddia edib. “Channel 14” isə hücum edən pilotun Oman sakini, xəsarət alan kapitanın isə BƏƏ rezidenti olduğunu açıqlayıb.

Rusiyanın Dubaydakı baş konsulluğu pilotlardan birinin Rusiya vətəndaşı olması barədə məlumatı təkzib edib.