ABŞ Prezidenti Donald Tramp Nyu-Yorkda Ukrayna Prezidenti Volodimir Zelenski ilə görüşü zamanı Rusiya Prezidenti Vladimir Putinin həm onunla, həm də Ukrayna lideri ilə danışıqlar aparmağa hazır olduğunu bildirib.

“The New York Times” yazır ki, bu iddianın doğruluğu hələlik sual altındadır.

Nəşrin məlumatına görə, Vladimir Putin dəfələrlə Volodimir Zelenski ilə mümkün təmasların yalnız Moskva şəhərində keçirilə biləcəyini açıqlayıb. Rusiya Prezidentinin mətbuat katibi Dmitri Peskov isə Zelenskinin Rusiyaya gəlmək qərarı verəcəyi təqdirdə onun təhlükəsizliyinin təmin olunacağını bildirib.

“New York Times” qeyd edir ki, Ağ Ev Ukraynadakı münaqişənin həlli istiqamətində aparılan prosesdə uzun fasilə verib. ABŞ-ın xüsusi nümayəndələri Stiv Uitkoff və Cared Kuşnerin Kremlin nümayəndələri ilə keçirdiyi görüşlərin də konkret nəticə vermədiyi vurğulanıb.

Volodimir Zelenski isə Trampla görüşündən sonra “Wall Street Journal” qəzetinə açıqlamasında Ukraynadakı münaqişənin qışdan əvvəl başa çatacağına inanmadığını bildirib.

Ukrayna lideri ABŞ-dan yeni hərbi yardım paketi tələb etdiyini və soyuq hava şəraiti başlamazdan əvvəl Kiyevin zəruri silahları əldə etməsinin vacib olduğunu deyib.

Bundan başqa, Donald Tramp Ukraynada “Patriot” hava hücumundan müdafiə sistemləri üçün raketlərin birgə istehsalı məsələsini nəzərdən keçirəcəyini bildirib. Lakin “Wall Street Journal”ın məlumatına görə, Zelenski bu məsələ ilə bağlı ABŞ prezidentindən konkret cavab ala bilməyib.