CNN teleşirkəti, MS NOW telekanalı və “Politico” nəşri jurnalistlərinin Ağ Evə girişinin bərpa olunması üçün ABŞ Prezidenti Donald Trampın administrasiyasına qarşı məhkəmə iddiası qaldırıblar.

Xarici mətbuata istinadən xəbər verilir ki, bu barədə üç media qurumunun birgə bəyanatında bildirilib.

Qeyd olunub ki, iddia ABŞ Konstitusiyasının mətbuat azadlığını təmin edən Birinci düzəlişinə əsaslanır. Media qurumları dövlətin mətbuatın yayımladığı materiallara görə qərar verməməsi prinsipini müdafiə etdiklərini açıqlayıblar.

Bəyanatda bildirilib ki, Ağ Ev əvvəlcədən xəbərdarlıq etmədən və müəyyən edilmiş prosedurlara əməl etmədən jurnalistlərin akkreditasiyalarını ləğv edib.

“Əgər buna etiraz edilməzsə, bu, mətbuat azadlığına və ictimaiyyətin dövlət müdaxiləsindən kənar müstəqil jurnalistikaya çıxış hüququna təhdid yaradır”, - deyə bəyanatda vurğulanıb.

Xatırladaq ki, daha əvvəl Donald Tramp CNN, MS NOW və “Politico”nun jurnalistlərinin Ağ Evə girişini qadağan edib. Tramp həmin media qurumlarını administrasiyası barədə yanlış məlumatlar yaymaqda ittiham edib.