ABŞ ordusu süni intellektdən istifadə edilməklə hazırlanmış səhv kəşfiyyat təhlili nəticəsində Yaxın Şərqdə hərəkət edən Çin gəmisinə qarşı hərbi əməliyyat keçirməyə hazırlaşıb.

CNN-in əldə etdiyi məlumata görə, hadisə bu ilin yazında ABŞ və İsrailin İrana qarşı hərbi əməliyyatlarının intensivləşdiyi dövrdə baş verib.

ABŞ ordusunun daxilində yayılan hesabatda Çin gəmisinin İranın nüvə silahı proqramı üçün komponentlər daşıdığı iddia edilib. Bundan sonra gəminin hərbi yolla saxlanılması və ələ keçirilməsi üçün hazırlıq görülüb.

Lakin əməliyyat başlamazdan əvvəl ABŞ rəsmiləri kəşfiyyat məlumatlarının yenidən yoxlanılmasını istəyiblər.

Nəticədə hesabatın ABŞ Xüsusi Əməliyyatlar Komandanlığının analitiki tərəfindən süni intellektin köməyi ilə hazırlandığı üzə çıxıb. Bildirilib ki, analitikin istifadə etdiyi çatbot gəminin yükünü yanlış müəyyən edib.

ABŞ mənbələrindən biri hadisə ilə bağlı hazırlanan hesabatın “tamamilə səhv” olduğunu və az qala müharibəyə səbəb ola biləcəyini bildirib.

Mənbə qeyd edib ki, Çin gəmisinə qarşı hərbi əməliyyat ABŞ ilə Çin arasında silahlı qarşıdurma riskini yarada bilərdi.

Gəminin daşıdığı yükün əslində nə olduğu açıqlanmayıb. Pentaqon isə məsələ ilə bağlı şərh verməyib.