İtaliyada Türkiyədən gələn logistika şirkətinə məxsus yük maşını silahlı şəxslərin hücumuna məruz qalıb.

Hadisə Bari yaxınlığında yerləşən A-14 magistral yolunda qeydə alınıb.

Antalyada yerləşən şirkətin sürücüsü S.S. İtaliyadan Türkiyəyə geri dönərkən dörd maskalı silahlı şəxsin hücumuna uğrayıb.

Məlumata görə, hücumçular avtomobillə yük maşınının qarşısını kəsib. Onlar rabitəni kəsmək məqsədilə tıxacdan istifadə edib, daha sonra yük maşınının şüşəsini sındıraraq sürücünü zorla avtomobildən çıxarıblar.

Hadisə zamanı sürücünün üzərində telefon və pul olmayıb. O, bir müddət sonra həyat yoldaşı ilə əlaqə saxlayaraq baş verənləri danışıb. Daha sonra məlumat şirkət rəhbərliyinə ötürülüb.

Silahlı basqının yük maşınının daxili kamerasında qeydə alındığı bildirilir.

Hücumçular yük maşınını ələ keçirsələr də, qoşqunun kilidini aça bilməyiblər. Buna görə də nəqliyyat vasitəsini tərk edərək qaçıblar.

Polis əməkdaşları yük maşınını daha sonra tapıblar. Hazırda hadisə ilə bağlı istintaq davam edir.