ABŞ İranın ali rəhbərliyinin nümayəndələrinin BMT Baş Assambleyasının 81-ci sessiyasında iştirakı üçün viza verilməsi barədə qərar qəbul edib.

Xarici KİV-in yaydığı məlumata əsasən, Nyu-Yorkda keçiriləcək yüksəksəviyyəli iclaslarda İran Prezidenti Məsud Pezeşkian və xarici işlər naziri Abbas Əraqçinin də iştirakına şərait yaradılacaq.

ABŞ Dövlət Departamenti qeyd edib ki, İran nümayəndə heyətinə qarşı bir sıra məhdudiyyətlər tətbiq ediləcək. Belə ki, heyətin sayı əvvəlki illərlə müqayisədə azaldılacaq, Nyu-York daxilində hərəkət və bəzi alış-veriş imkanları ilə bağlı mövcud qaydalar saxlanılacaq.

Məlumata görə, ABŞ BMT Baş Qərargahına ev sahibliyi edən ölkə kimi beynəlxalq öhdəliklərə malikdir. 1947-ci ildə imzalanmış BMT Baş Qərargah Sazişi çərçivəsində Vaşinqton xarici nümayəndələrin təşkilatın tədbirlərində iştirakını təmin etməlidir.

Bununla yanaşı, milli təhlükəsizlik və xarici siyasət məsələləri ilə bağlı müəyyən hallarda məhdudiyyətlər tətbiq oluna bilər.

Xatırladaq ki, ABŞ Fələstin Prezidenti Mahmud Abbas və bir sıra digər Fələstin rəsmilərinə BMT Baş Assambleyasına qatılmaq üçün viza verməkdən imtina edib.