Əfqanıstan vətəndaşı Məhəmməd Şərifullah 2021-ci ildə Kabil hava limanı yaxınlığında törədilən partlayışda iştirakına görə ABŞ-də 20 il müddətinə həbs cəzasına məhkum olunub.

TASS-ın məlumatına görə, bu barədə ABŞ Ədliyyə Nazirliyi açıqlama yayıb.

Nazirliyin məlumatında Şərifullahın 2024-cü ildə Moskva vilayətindəki “Crocus City Hall” konsert kompleksinə silahlı hücum edən şəxslərin fəaliyyətinin koordinasiyasında da iştirak etdiyi bildirilib.

İstintaqın versiyasına görə, o, 2021-ci ildə Kabil hava limanına aparan yolun vəziyyətini yoxlayaraq həmin istiqamətin təhlükəsiz olduğu barədə məlumat verib. Bundan bir neçə saat sonra hava limanının girişində partlayış baş verib. Hadisə nəticəsində 13 ABŞ hərbçisi və 160-dan çox mülki şəxs ölüb.

Şərifullahın “Crocus City Hall” hücumunda iştirak edən şəxslərlə əlaqə saxladığı və onlara AK tipli avtomatlar da daxil olmaqla müxtəlif silahlardan istifadə qaydaları barədə təlimat verdiyi qeyd olunub.

ABŞ tərəfinin açıqlamasına əsasən, Şərifullah 2016–2025-ci illərdə İŞİD-in 10-dan çox hücumunda iştirak edib.

O, 2025-ci ildə Pakistan-Əfqanıstan sərhədi yaxınlığında tutulub. Daha sonra ABŞ-yə ekstradisiya edilən Şərifullah dindirmə zamanı Kabil hava limanı yaxınlığındakı hücumda, eləcə də Rusiya və İranda bir sıra hücumlarda iştirak etdiyini etiraf edib.

Xatırladaq ki, “Crocus City Hall”da 2024-cü il martın 22-də törədilən hücum nəticəsində 145 nəfər həyatını itirib.