Uqandada Toro Krallığının yeni hökmdarının müəyyənləşdirilməsi ilə bağlı prosesdə gözlənilməz qərar qəbul edilib.

Mərhum Kral IV Oyo Nyimba Kabamba İquru Rukidinin varisi kimi seçilən 36 yaşlı Corc Desmond Kamurasi taxtı qəbul etməkdən imtina edib.

Londonda yaşayan Kamurasi İngiltərə futbolunun doqquzuncu liqasında mübarizə aparan “Si Dons” klubunun kapitanı və qapıçısıdır. O, kral varislik komitəsinin 21 üzvündən 15-nin dəstəyini qazanıb.

Buna baxmayaraq, Kamurasi digər öhdəliklərini əsas gətirərək bu vəzifədən imtina edib. Yerli medianın yazdığına görə, onun Londonda ailəsi var və Kral Oyonun dəfn mərasimi ilə üst-üstə düşən futbol görüşündə iştirak etməsi nəzərdə tutulub.

Kamurasinin qərarından sonra varislik komitəsi Şahzadə Edvard Rukidi Kiyanangomanı yeni namizəd seçib. O, Uqanda Yayım Korporasiyasında aparıcı və redaktor kimi çalışır.

Lakin bu seçim də kral ailəsinin daxilində narazılıq yaradıb. Mərhum kralın yaxınları komitənin qərarını qəbul etməyib.

Kralın anası və ailənin digər üzvləri faktiki olaraq ev dustaqlığında saxlandıqlarını bildiriblər. Şahzadə Rut Komuntale isə özünə və Kraliça Anna Best Kemigisaya qarşı sui-qəsd hazırlandığını iddia edib.

Komuntale, həmçinin Kral Oyonun 2022-ci ildə hazırladığı bildirilən vəsiyyətnaməni yayımlayıb. Sənəddə adı açıqlanmayan “bioloji oğul”un varis kimi göstərildiyi bildirilir. Bu məlumatın Toro elitasında təəccüb doğurduğu qeyd olunur.

Kral Oyo üç yaşında taxta çıxmışdı. O, 31 il Toro Krallığına rəhbərlik etdikdən sonra 34 yaşında ABŞ-də xərçəng müalicəsi zamanı vəfat edib.

Uqanda Prezidenti Yoveri Museveni dəfn mərasimində tərəfləri məsələnin sülh və hüquqi yollarla həllinə çağırıb.

Uqanda respublika olsa da, ölkədə dörd ənənəvi krallıq dövlət tərəfindən tanınır. Bu qurumlar əsasən mədəni fəaliyyətlərlə məşğul olur.