Belçikada qeyri-adi hadisə baş verib. Flamand Parlamentinin deputatı Frederik Erens təxminən 13 saat ərzində tualetdə bağlı vəziyyətdə qalıb.

58 yaşlı deputat parlamentin qrup ofislərinin yerləşdiyi əlavə binada görüşdən sonra tualetə daxil olub. Qapını bağladığı zaman kilid mexanizminin bir hissəsi sınıb və qapını açmaq mümkün olmayıb.

Telefonunu iş masasının üzərində qoyan Erens kömək üçün heç kimə zəng edə bilməyib. Nəticədə o, gecəni tualetdə keçirməli olub.

İçəridə havanın getdikcə ağırlaşdığını hiss edən deputat tualetdə tapdığı metal əşyadan istifadə edərək qapının yuxarı və aşağı hissəsində iki dəlik açıb. Yanğına davamlı qapı səbəbindən otaqda hava dövranının məhdud olduğu bildirilib.

Erens yalnız səhər saat 06:00 radələrində təmizlik işçiləri tərəfindən aşkar edilib. Qapı lomla açılıb və deputat azad edilib.

Tənəffüsündə çətinlik yaranan Erens Brüsseldəki “Saint-Jean” xəstəxanasına aparılıb. Müayinədən sonra xəstəxanadan buraxılan deputatın vəziyyətinin yaxşı olduğu açıqlanıb.

Frederik Erens “Vlaams Belang” partiyasının üzvüdür və 2024-cü ildən Flamand Parlamentində Vlaams-Brabant seçki dairəsini təmsil edir.