İran və Ermənistan Norduz-Mehri sərhəd-keçid məntəqəsində gömrük prosedurlarının sadələşdirilməsi və nəqliyyat vasitələrinin keçidinin sürətləndirilməsi barədə razılığa gəlib.

“Armenia Today”in məlumatına görə, bununla bağlı sentyabrın 12-də Culfada İran Gömrük Xidmətinin rəhbəri Farud Əsgəri və Ermənistan Dövlət Gəlirləri Komitəsinin sədri Eduard Hakopyan arasında keçirilən görüşdə protokol imzalanıb.

Sənədə əsasən, sərhəd-keçid məntəqəsində sadələşdirilmiş “yaşıl dəhliz” tətbiq ediləcək. Eyni zamanda kağız sənədləşmədən imtina edilərək elektron məlumat mübadiləsi – EDI və Pre-Arrival sistemlərinə keçid həyata keçiriləcək.

Bu dəyişikliklərin yük maşınlarının sərhəddə gözləmə müddətinin azaldılması və gömrük prosedurlarının daha operativ həyata keçirilməsinə şərait yaradacağı gözlənilir.

Tərəflər, həmçinin Norduz-Mehri sərhəd-keçid məntəqəsinin birgə istifadəsi haqqında sazişin müddətini daha 10 il uzadıblar.

Bundan başqa, səlahiyyətli iqtisadi operatorların (AEO) statuslarının qarşılıqlı tanınması barədə razılıq əldə edilib.