ABŞ Prezidentinin xüsusi nümayəndəsi Cared Kuşner Rusiya-Ukrayna münaqişəsinin həlli ilə bağlı danışıqlarda ən ciddi problemin ərazi məsələsi olduğunu açıqlayıb.

Kuşner bu barədə Kiyevdə keçirilən Yalta Avropa Strategiyasının (YES 2026) görüşündə danışıb.

O bildirib ki, Vaşinqton Moskva və Kiyevlə aparılan son danışıqlardan məmnundur. Bununla belə, tərəflərin mövqeləri arasında ciddi fikir ayrılıqları qalır.

“Ən mürəkkəb mövzu əvvəlki kimi ərazi məsələsidir”, – Kuşner deyib.

ABŞ rəsmisi qeyd edib ki, bu məsələ döyüş meydanında baş verən proseslərlə də sıx bağlıdır. Onun sözlərinə görə, texnologiyadakı inkişaf və cəbhədəki vəziyyətin dəyişməsi tərəflərin gözləntilərinə təsir göstərib.

Kuşner Vaşinqtonun Rusiya, ABŞ və Ukrayna nümayəndələrinin iştirakı ilə üçtərəfli görüşün mümkün qədər tez keçirilməsinə çalışdığını bildirib.

Onun sözlərinə görə, tərəflərin birbaşa danışıqlar masasında bir araya gəlməsi münaqişənin həlli baxımından daha səmərəli ola bilər.

Kuşner həmçinin bildirib ki, Rusiya Prezidenti Vladimir Putin ABŞ nümayəndə heyəti ilə görüşdə öz mövqeyini açıq şəkildə ifadə edib.

Amerikalı diplomat münaqişənin həlli istiqamətində yaxın həftələrdə irəliləyiş əldə olunacağına ümid etdiyini söyləyib.