Almaniyanın sağçı “Almaniya üçün Alternativ” (AfD) partiyasının Saksoniya-Anhalt üzrə lideri Ulrix Ziqmund miqrantların deportasiyası zamanı hərbi resurslardan, o cümlədən silahlardan istifadə imkanından danışıb.

“The Telegraph” xəbər verir ki, Ziqmund “remiqrasiya” siyasəti çərçivəsində sığınacaq axtaran miqrantların Şərqi Almaniyadan deportasiya edilməsi üçün müvafiq resurslara ehtiyac olduğunu bildirib.

O, Maqdeburqda İsrailin “Elbit Systems” şirkətinin Zangerhauzendə istehsal müəssisəsi yaratmaq planları ilə bağlı keçirilən mətbuat konfransında yerli istehsal olunan silahların qanunsuz miqrasiyaya qarşı mübarizədə istifadə oluna biləcəyini deyib.

“Gələcək remiqrasiya və deportasiya kampaniyası üçün bizə də müvafiq resurslar lazım olacaq”, - Ziqmund bildirib.

Açıqlama Almaniyada siyasi reaksiyalara səbəb olub. Bundan sonra Ziqmundun ofisi onun sözlərinə aydınlıq gətirərək müdafiə sənayesinin yalnız silah istehsalından ibarət olmadığını qeyd edib.

Ofisdən bildirilib ki, bu sahəyə polis, təhlükəsizlik xidmətləri və Almaniya silahlı qüvvələrinin istifadə etdiyi nəqliyyat vasitələri, avadanlıqlar və müdafiə texnologiyaları da daxildir.

Ziqmund isə deportasiyaların həyata keçirilməsi və “real remiqrasiya əməliyyatının mümkün olması” üçün dövlətin potensialını gücləndirməli olduğunu vurğulayıb.

Müxalifət nümayəndələri açıqlamanı sərt tənqid ediblər. BSW deputatı Klaudiya Vitte deportasiyaların hərbi əməliyyat olmadığını və hərbi silahlardan istifadənin yolverilməz olduğunu bildirib.

SPD-dən Katya Pahle bunu “siyasi təhdid”, Yaşıllar Partiyasının deputatları İrene Mixaliç və Feliks Banaszak isə “dərin şok” və “narahatedici” kimi qiymətləndiriblər.

Qeyd edək ki, AfD-nin “remiqrasiya” siyasəti qanunsuz miqrantların, xarici cinayətkarların və sığınacaq müraciəti rədd edilən şəxslərin deportasiyasını nəzərdə tutur.

Ziqmund 2026-cı ildə Saksoniya-Anhalt əyalətində keçirilən seçkilərdə 43,8 faiz səs toplayıb. AfD isə hökumət formalaşdırmaq üçün yetərli çoxluğa malik deyil.