Qazaxıstan Prezidenti Kasım-Jomart Tokayev ABŞ Prezidenti Donald Trampı Qazaxıstana rəsmi səfərə dəvət edib.

Qazaxıstan Prezidentinin mətbuat xidmətinin yaydığı məlumata əsasən, dəvət Nyu-Dehlidə BRICS sammiti çərçivəsində keçirilən görüşdə bir daha gündəmə gətirilib.

Tokayev ABŞ Prezidentinin Cənubi və Orta Asiya üzrə xüsusi nümayəndəsi Serxio Qorla görüşüb. Görüşdə Qor Donald Trampın Qazaxıstanın müstəqilliyinin 35-ci ildönümü münasibətilə göndərdiyi təbrik mesajını Tokayevə təqdim edib.

Qazaxıstan lideri təbrikə görə ABŞ prezidentinə minnətdarlığını bildirib və onu ölkəsinə səfərə dəvətini təsdiqləyib.

Tokayev dekabrda Mayamidə keçiriləcək G20 sammitində iştirak etməyi planlaşdırdığını da açıqlayıb. O bildirib ki, sammit çərçivəsində ABŞ-Qazaxıstan münasibətlərinin gündəliyində olan məsələlərin müzakirəsi üçün imkan yarana bilər.

Görüşdə iki ölkə arasında strateji tərəfdaşlığın inkişafı müsbət qiymətləndirilib. Tokayev əməkdaşlıqda konkret nəticələrə və praktiki addımlara üstünlük verdiklərini qeyd edib.

Serxio Qor isə liderlər arasındakı sıx münasibətlərin ABŞ-Qazaxıstan əlaqələrini yeni mərhələyə yüksəltdiyini bildirib.

Bundan əlavə, tərəflər süni intellekt və rəqəmsallaşma istiqamətlərində əməkdaşlığın genişləndirilməsi imkanlarını nəzərdən keçiriblər.