Avropa ölkələrinin hüquq-mühafizə orqanları internetdən istifadə edən yeniyetmələr arasında konkret ideologiyaya əsaslanmayan yeni zorakı ekstremizm formasının yayıldığını müəyyən ediblər.

Associated Press-ə istinadən xəbər verir ki, bu qruplarda iştirak edən şəxsləri əsasən zorakılığa maraq, qəddar davranış nümayiş etdirmək və sosial şəbəkələrdə tanınmaq istəyi birləşdirir.

Avropa İttifaqının terrorizmlə mübarizə koordinatoru Bartjan Vegter bildirib ki, söhbət bəzi hallarda zorakılığın hər hansı siyasi və ya dini məqsəddən kənar şəkildə, məhz zorakılığın özü naminə törədilməsindən gedir.

Onun sözlərinə görə, yeniyetmələr zorakı hücumların görüntülərini paylaşır, cinayətləri müzakirə edir və bir-birlərini real həyatda oxşar hərəkətlərə sövq edirlər.

İyun və iyul aylarında doqquz Avropa ölkəsinin hüquq-mühafizə orqanlarının keçirdiyi əməliyyat zamanı belə icmalardan biri ilə əlaqəli təxminən 4 340 internet ünvanı müəyyən edilib.

Qeyd olunub ki, həmin icmanın vahid rəhbərliyi və ya formalaşmış strukturu yoxdur. Bu isə hüquq-mühafizə orqanlarının araşdırmalarını çətinləşdirir.

Məlumata görə, iştirakçılar sosial şəbəkələr, qapalı çatlar və şifrələnmiş platformalar arasında sürətlə keçid edirlər. Bəzi şəxslərin şantaj və psixoloji təzyiq vasitəsilə yeniyetmələri özlərinə və ya digər insanlara zərər vurmağa, habelə baş verənlərin görüntülərini yaymağa məcbur etdiyi bildirilir.

Həmçinin məhkumluğu olmayan və tanınmış radikal qruplarla açıq əlaqəsi müəyyən edilməyən şəxslərin yaratdığı təhlükəyə diqqət çəkilib. Belə şəxslər hüquq-mühafizə orqanlarının diqqətindən kənarda qalaraq zorakılıq məzmunlu materiallara baxa və hücumların hazırlanmasında iştirak edə bilərlər.

Avropolun məlumatına əsasən, 2025-ci ildə Avropa İttifaqının 10 ölkəsində qarşısı alınan və baş tutmayan cəhdlər də daxil olmaqla 45 terror aktı qeydə alınıb. Hadisələr nəticəsində 6 nəfər həyatını itirib.

Eyni zamanda, 21 ölkədə terror fəaliyyəti ilə əlaqədə şübhəli bilinən 486 nəfər saxlanılıb.

Avropa qurumları yeni təhlükə ilə mübarizə məqsədilə rəqəmsal araşdırma imkanlarının genişləndirilməsini vacib hesab edirlər. Bununla yanaşı, qapalı yazışmalara nəzarətin gücləndirilməsinin vətəndaşların məxfilik hüququna təsir göstərə biləcəyi də qeyd olunur.