İlon Mask süni intellekt və robot texnologiyalarının inkişafının qarşıdakı 10 il ərzində dünya iqtisadiyyatında fundamental dəyişikliklərə səbəb ola biləcəyini düşünür.

Bu barədə o, “The Economist” nəşrinə müsahibəsində danışıb.

Maskın sözlərinə görə, süni intellekt və humanoid robotların imkanlarının genişlənməsi nəticəsində gələcəkdə insanların maddi təminat üçün işləməsinə ehtiyac qalmaya bilər.

“2036-cı ildə pulun heç bir əhəmiyyəti qalmayacaq”, - deyə milyarder proqnozunu açıqlayıb.

O bildirib ki, süni intellekt gələcəkdə proqramlaşdırma, analitika, maliyyə, hüquq və mühəndislik daxil olmaqla bir sıra intellektual peşələrdə əsas iş yükünü üzərinə götürə bilər.

Eyni zamanda, humanoid robotların istehsalat, logistika və texniki xidmət kimi fiziki əmək tələb edən sahələrdə geniş tətbiq ediləcəyi gözlənilir.

Maskın fikrincə, texnoloji inkişaf nəticəsində mal və xidmətlərin istehsal imkanları kəskin artacaq. Bu isə ənənəvi əmək modelinin dəyişməsinə və insanların işləməyə münasibətinin yenidən formalaşmasına gətirib çıxara bilər.

Milyarder hesab edir ki, belə bir şəraitdə işləmək zərurətdən daha çox şəxsi seçim xarakteri daşıya bilər.