Qazaxıstan Rusiya və Ukrayna arasında davam edən münaqişənin sülh yolu ilə nizamlanması üçün danışıqların təşkilinə hazır olduğunu bildirib.

“RİA Novosti”nin məlumatına görə, bu barədə Qazaxıstan Xarici İşlər Nazirliyi açıqlama yayıb.

Nazirliyin bəyanatında Astananın böhranın siyasi və diplomatik vasitələrlə həllini dəstəklədiyi qeyd olunub.

Qazaxıstan tərəfi vurğulayıb ki, Rusiya və Ukraynadan danışıqların keçirilməsi ilə bağlı müraciət daxil olarsa, bunun üçün lazımi şəraitin yaradılması mümkündür.

Açıqlamaya əsasən, belə bir müraciət olduğu halda danışıqların təşkili ilə bağlı bütün texniki və təşkilati məsələlər operativ şəkildə nəzərdən keçiriləcək.

Bununla yanaşı, Türkiyə də Rusiya və Ukrayna arasında yeni danışıqların keçirilməsinə vasitəçilik etməyə hazır olduğunu açıqlayıb. Ankara İstanbulun birbaşa dialoq üçün uyğun məkan olaraq qaldığını bildirib.