İranda ölkə miqyasında davam edən etiraz aksiyaları fonunda azı 11 vətəndaşın saxlanıldığı bildirilir. HRANA insan haqları agentliyinin yaydığı məlumata görə, həbs edilənlər arasında Şiraz şəhərindən olan vəkil Məhəmməd Hadi Cəfərpur, Yasuc şəhərində yaşayan 16 yaşlı yeniyetmə Qəzəl Qəndari və tələbə fəalı Erfan Movaşati də var.
Bundan başqa, İzeh şəhərindən olan müəllim Arman Şapurinin həbsindən artıq üç həftə keçməsinə baxmayaraq, onun taleyi barədə heç bir rəsmi məlumat verilməyib. Eyni zamanda, Sərdəşt şəhərində Əcvan Xəzrian və Səqqezdə Sediq Yusif-Purun təhlükəsizlik qüvvələri tərəfindən saxlanıldığı bildirilir.
HRANA-nın məlumatına əsasən, vəkil Məhəmməd Hadi Cəfərpur üç gün əvvəl Şirazda həbs edilib. 16 yaşlı Qəzəl Qəndari isə yanvarın 20-də Yasucda saxlanılıb. Stomatologiya fakültəsinin tələbə islam cəmiyyətinin katibi Erfan Movaşati yanvarın 11-də həbs olunub. Saxlanılan şəxslərin hamısı naməlum istiqamətə aparılıb.
Kurdpa xəbər agentliyi də Sərdəştdə Əcvan Xəzrianın, Səqqezdə isə Sediq Yusif-Purun məhkəmə orderi təqdim edilmədən həbs olunduğunu yazıb. Onların da saxlanıldıqdan sonra haraya aparıldığı açıqlanmayıb.
Digər məlumatda isə Dehqulan şəhərində Hüseyn Əmiri və Yadi Sarmasti, İlamda isə Milad, Payam və Sina Mirzabeygi qardaşlarının iki həftədən artıqdır saxlanıldığı, lakin vəziyyətləri barədə heç bir məlumatın olmadığı qeyd edilir. Ailələrin aidiyyəti qurumlara müraciətlərinə baxmayaraq, rəsmi orqanlar aydın cavab verməkdən imtina edir ki, bu da yaxınlarının narahatlığını daha da artırır.
Müəllimlər Birliyinə yaxın mənbələr isə İzeh şəhərindən olan müəllim Arman Şapurinin dekabrın 30-da etirazlar zamanı həbs edildiyini bildirib. O vaxtdan bəri ailəsi ilə əlaqə saxlamadığı və saxlanıldığı yer barədə heç bir məlumatın olmadığı vurğulanır.
Hazırda saxlanılan şəxslərə qarşı irəli sürülən ittihamlar açıqlanmayıb. Qeyd olunur ki, vəkil Məhəmməd Hadi Cəfərpur daha əvvəl də peşə fəaliyyəti ilə bağlı təqiblərlə üzləşib.
Xatırladaq ki, etiraz aksiyaları dekabrın 28-də Tehranda bazar və ticarət obyektlərində başlayan tətil və etirazlarla start götürüb, daha sonra ölkənin digər bölgələrinə yayılıb. Tələbələr, müxtəlif sosial qruplar və vətəndaşların iştirakı ilə bu aksiyalar son illərin ən genişmiqyaslı etirazlarından biri kimi qiymətləndirilir.

Urbaninfo.az