ABŞ-nin Rusiya ilə Moskva görüşündə yalnız Stiv Uitkoff və Cared Kuşner deyil, bir sıra digər yüksəkvəzifəli rəsmilər də iştirak edib.

 “Axios”un jurnalisti Barak Ravid mənbələrə əsasən “X” hesabında görüşün bəzi detallarını açıqlayıb.

Məlumata görə, ABŞ Milli Təhlükəsizlik Şurası, Dövlət Departamenti və Maliyyə Nazirliyinin nümayəndələri də danışıqlarda iştirak ediblər. Görüşdə əsas diqqət Rusiya-Ukrayna münaqişəsinin həlli istiqamətində növbəti addımların müəyyənləşdirilməsinə yönəlib.

Barak Ravidin yazdığına görə, tərəflər yaxın həftələrdə elan olunması planlaşdırılan addımlarla bağlı konkret planları müzakirə edib və Ukraynada da oxşar nəticəli görüşlərin keçirilməsinə ümid ifadə olunub.

Jurnalist həmçinin bildirib ki, ABŞ Maliyyə Nazirliyinin sanksiyalar üzrə yüksəkvəzifəli əməkdaşı Cin Lanq da Moskvaya gedən nümayəndə heyətinin tərkibində olub. O, Vladimir Putinlə görüşə qatılmayıb, lakin Rusiya Prezidentinin xüsusi nümayəndəsi Kirill Dmitriyevlə görüşüb.

Xatırladaq ki, sentyabrın 5-də Rusiya Prezidenti Vladimir Putin Kremldə ABŞ-nin nümayəndələri Stiv Uitkoff və Cared Kuşnerlə üç saatdan çox davam edən görüş keçirib. Yuri Uşakov danışıqları məzmunlu və faydalı adlandırıb.