Putinin Uitkoff və Kuşnerlə görüşü 3 saatdan çox davam edib

Rusiya Prezidenti Vladimir Putin ABŞ prezidentinin xüsusi nümayəndələri Stiv Uitkoff və Cared Kuşnerlə görüşüb.

TASS-a istinadən xəbər verir ki, Kremldə keçirilən görüş 3 saatdan çox davam edib.

Görüş başa çatdıqdan sonra Uitkoff və Kuşnerin kortejləri Kremldən yola düşüb.

Danışıqlarda Rusiya tərəfdən prezidentin beynəlxalq məsələlər üzrə köməkçisi Yuri Uşakov və xüsusi nümayəndəsi Kirill Dmitriyev iştirak edib.

Görüşdən əvvəl Putin müzakirə olunacaq vəziyyəti mürəkkəb adlandırıb.

Qeyd edək ki, bu, Putinin Stiv Uitkoffla səkkizinci görüşüdür. Cared Kuşner isə Ukrayna üzrə nizamlanma məsələsinə dair müzakirələrdə üçüncü dəfə iştirak edir.

Bildirilir ki, Uitkoff və Kuşner Moskvadakı görüşdən sonra danışıqları davam etdirmək məqsədilə Kiyevə səfər edəcəklər. Onların sentyabrın 6-da Ukrayna Prezidenti Volodimir Zelenski ilə görüşməsi planlaşdırılır.

ABŞ nümayəndələrinin Moskvaya səfəri çərçivəsində Ukraynada atəşkəsin şərtləri və ərazi məsələlərinin müzakirə edildiyi bildirilir. Ağ Ev nümayəndələrinin danışıqlara müharibənin dayandırılmasına dair yeni sülh planı ilə gəldiyi qeyd olunur.