Türkiyənin məşhur kurort şəhəri Fethiyenin yaxınlığında güclü meşə yanğını baş verib.

Türkiyə hakimiyyəti hazırda Fethiye kurortunda yerləşən otellərin turistlərinin təxliyə edilməsini planlaşdırmır. Bu barədə Rusiyanın Antalyadakı Baş Konsulluğu Türkiyənin fövqəladə hallar xidmətlərinə istinadən məlumat yayıb.

Baş Konsulluğun məlumatına görə, hazırda turistlərin başqa əraziyə köçürülməsindən söhbət getmir. Yanğının söndürülməsi işləri planlı şəkildə davam etdirilir və diplomatik nümayəndəlik vəziyyəti nəzarətdə saxlayır.

Yanğının ocağının yerləşdiyi Karagedik rayonunun rəhbərliyindən bildirilib ki, bir neçə evin sakinləri təhlükəsizlik məqsədilə təxliyə olunub. Bununla belə, hazırda otellər üçün təhlükənin olmadığı açıqlanıb.

Məlumatı TASS yayıb.