Çeçenistan Təhlükəsizlik Şurasının katibi Adam Kadırov Abxaziya Müdafiə Nazirliyinin “Döyüş yoldaşlığına görə” medalı ilə təltif olunub. Bu barədə onun atası, Çeçenistan rəhbəri Ramzan Kadırov Telegram kanalında məlumat verib.

Adam Kadırova medal Rusiya Xüsusi Təyinatlı Qüvvələr Universitetinin bazasında keçirilən güc strukturları arasında Beynəlxalq Açıq Taktiki Atıcılıq Çempionatının qaliblərinin mükafatlandırılması mərasimində təqdim edilib.

Məlumata görə, o, Abxaziya Respublikası ilə “qarşılıqlı fəaliyyətin yüksək səviyyəsinə və əməkdaşlığın möhkəmləndirilməsinə” verdiyi töhfəyə görə mükafatlandırılıb.

Bu, Adam Kadırovun son dövrlərdə aldığı ilk mükafat deyil. Mayın 31-də o, Rusiyanın Ukraynada keçirdiyi xüsusi hərbi əməliyyata töhfəsinə görə medalla təltif olunub. İyunda isə Rusiya qarşısındakı “müstəsna xidmətlərinə” görə Çeçenistan Qəhrəmanı adına layiq görülüb.

18 yaşlı Adam Kadırov Çeçenistan rəhbəri Ramzan Kadırovun köməkçisi, 2023-cü ilin noyabrından isə Çeçenistan rəhbərinin Təhlükəsizlik Xidmətinin rəhbəridir. 2024-cü ilin avqustunda ona Çeçenistanın ən yüksək regional mükafatı olan Kadırov ordeni təqdim edilib. O, həmçinin bir sıra digər orden və medallarla da təltif olunub.