Moldova Ukrayna ilə sərhəddə yerləşən “Mirnoye” buraxılış məntəqəsinin fəaliyyətini müvəqqəti dayandırıb.

Moldova Daxili İşlər Nazirliyinin məlumatına görə, qərara Ukraynanın Odessa vilayətindəki “Tabaki” sərhəd-keçid məntəqəsinin ərazisinə pilotsuz uçuş aparatının düşməsi səbəb olub.

Hadisə avqustun 21-nə keçən gecə baş verib. Məlumata görə, PUA Ukrayna ərazisinə, Moldova sərhədindən təxminən 300 metr məsafəyə düşüb. Nəticədə “Tabaki” keçid məntəqəsinə ziyan dəyib və ərazidə yanğın baş verib.

İlkin məlumata əsasən, hadisə nəticəsində xəsarət alan olmayıb.

Moldova tərəfi öz ərazisində pilotsuz uçuş aparatının qalıqları və digər təhlükəli əşyalar aşkar etməyib. Ukrayna Dövlət Sərhəd Xidməti isə “Tabaki” keçid məntəqəsinin də fəaliyyətini dayandırdığını bildirib.

Bu, son günlər Moldova-Ukrayna sərhədində PUA ilə bağlı qeydə alınan növbəti hadisədir.