Ukrayna Ali Radasında cadugərlər, maqlar və ekstrasenslər üçün inzibati məsuliyyətin tətbiqini nəzərdə tutan qanun layihəsi qeydiyyata alınıb.

Urbaninfo.az xəbər verir ki, bu barədə məlumat Ukrayna parlamentinin rəsmi saytında yer alıb.

Sözügedən qanun layihəsi Prezident Ofisinin sabiq rəhbəri Andrey Yermakın falçısı ilə bağlı yaşanan səs-küylü skandaldan dərhal sonra irəli sürülüb. Sənəddə İnzibati Xətalar Məclisinə dəyişiklik edilməsi təklif olunur. Dəyişikliyə əsasən, ödənişli falçılıq, ekstrasenslik, sehrbazlıq, ezoterika və okkultizm xidmətləri göstərənlər, həmçinin bu növ xidmətlərin reklamı, populyarlaşdırılması və yayılması ilə məşğul olanlar cəzalandırılacaq.

Qeyd edək ki, Ukraynanın “Hromadske” nəşri Yermakın “Veronika Fenşuy Ofis” adlı şəxslə yazışmalarını ifşa edib. Jurnalistlərin araşdırmasına görə, sabiq məmur ən azı 2020-ci ildən bəri mühüm dövlət və kadr təyinatlarında bu falçı ilə məsləhətləşib, namizədlərin doğum tarixlərini ona göndərib. Yazışmalarda Ukraynanın Baş naziri, Səhiyyə naziri, Baş prokuror və Prezident Ofisi rəhbərinin müavini postlarına namizəd olan şəxslərin taleyi müzakirə edilib.

Bundan əvvəl isə hüquq-mühafizə orqanları Yermakın ofisində keçirdikləri axtarışlar zamanı çoxlu sayda okkultizm və cadu ləvazimatları aşkar etmişdilər.

Xatırladaq ki, mayın 14-də Andrey Yermak Kiyev vilayətində elit kottec qəsəbəsinin tikintisində 460 milyon qrivenin yuyulması ittihamı ilə 60 sutka müddətinə həbs edilib.