Malayziya hakimiyyəti sosial şəbəkə X-də fəaliyyət göstərən, İlon Maska məxsus xAI şirkəti tərəfindən hazırlanmış Grok çat-botuna müvəqqəti giriş məhdudiyyəti tətbiq edib. Buna səbəb süni intellekt vasitəsilə qeyri-etik və ədəbsiz məzmunun yayılması riski olub.
Urbaninfo.az xəbər verir ki, bu barədə Malayziyanın Kommunikasiya və Multimedia Komissiyasının yaydığı rəsmi bəyanatda qeyd olunub. Bildirilib ki, tənzimləyici qurum X və xAI şirkətlərinə rəsmi bildiriş göndərərək, milli qanunvericiliyin – o cümlədən rabitə və multimedia haqqında qanunun tələblərini pozan məzmunun yaranmasının qarşısını alan texniki və moderasiya mexanizmlərinin tətbiqini tələb edib.
Komissiyanın qiymətləndirməsinə görə, şirkətlərin təqdim etdiyi cavablar əsasən istifadəçi şikayətləri mexanizminə söykənib və süni intellekt alətinin iş prinsiplərindən doğan riskləri kifayət qədər nəzərə almayıb. Bu tədbirlər mümkün zərərin qarşısını almaq və hüquqi tələblərə əməl etmək baxımından yetərli hesab edilməyib.
Nəticədə, hüquqi və tənzimləyici prosedurlar başa çatana qədər Grok çat-botuna girişin müvəqqəti məhdudlaşdırılması qərara alınıb. Qurum vurğulayıb ki, məhdudiyyət xüsusilə qadınlar və uşaqlarla bağlı zərərli məzmunun yayılmasının qarşısını almağa yönəlib.
Qeyd edək ki, Bloomberg agentliyi daha əvvəl Grok modelinin yetkinlik yaşına çatmayanların iştirakı ilə pornoqrafik təsvirlər yaratdığını və bunun platforma qaydalarının pozulması ilə nəticələndiyini yazmışdı. Məlumata görə, sözügedən məzmun sonradan silinib. Grok-un X platformasındakı rəsmi profilində isə şirkətin aşkarlanan boşluqların təcili aradan qaldırılması üzərində çalışdığı bildirilib.