Paytaxt küçələrində tez-tez görüntülənən “10-YY-007” dövlət qeydiyyat nişanlı “Bentley” və “10-YY-002” nömrəli “Range Rover” markalı lüks avtomobillər sosial şəbəkələrdə geniş müzakirələrə səbəb olub.
Avtomobil həvəskarlarının paylaşdığı görüntülər qısa müddətdə gündəmə çevrilib. İstifadəçilər xüsusilə bu “elit” nömrə nişanlarının kimə məxsus olması ilə maraqlanıblar.
Yerli media resurslarında və sosial platformalarda yayılan iddialara görə, sözügedən nəqliyyat vasitələrinin sabiq millət vəkili Sabir Rüstəmxanlı və hazırkı deputat Tənzilə Rüstəmxanlının oğlu Cəmil Rüstəmxanlıya məxsus olduğu bildirilir.

Karyerası və fəaliyyəti

Məlumatlara əsasən, Cəmil Rüstəmxanlı daha əvvəl Azərbaycan Avtomobil Yolları Dövlət Agentliyində sədr müavini və İnvestisiya İdarəsinin rəisi vəzifələrində çalışıb.
O, eyni zamanda idman sahəsində də fəaliyyət göstərərək “Azəryol” voleybol klubuna rəhbərlik edib. Lakin bəzi mənbələrdə onun rəhbərliyi dövründə klubun fəaliyyətinin zəiflədiyi qeyd olunur.

Türkiyədə biznes fəaliyyəti

İddialara görə, Cəmil Rüstəmxanlı 2022-ci ilin noyabr ayında vəzifəsindən ayrılıb. Onun daha sonra Türkiyəyə köçərək biznes fəaliyyəti ilə məşğul olduğu bildirilir.
“Elit” nömrələr yenə diqqət mərkəzində
Qeyd edək ki, “YY” seriyalı dövlət qeydiyyat nişanları Azərbaycanda qeyri-rəsmi olaraq “elit nömrələr” hesab olunur və bu tip avtomobillər tez-tez sosial mediada müzakirə mövzusuna çevrilir.

Qeyd: Yazıda yer alan məlumatlar sosial şəbəkələrdə və açıq mənbələrdə yayılan iddialara əsaslanır və rəsmi təsdiqini tapmayıb. Məqalədə 32 gün.az-da gedən yazıdan istifadə edilib.