8 Mart – qadınların hüquqlarının, əməyinin və cəmiyyətdəki rolunun qeyd olunduğu xüsusi gündür. Dünyanın bir çox yerində bu gün qadınlara diqqət göstərilir, onların zəhməti qiymətləndirilir. Lakin bəzən bu “təbriklər” real həyatda tam fərqli mənzərə yaradır.
Sosial şəbəkələrdə yayılan görüntülərə görə, Suraxanı Rayon İcra Hakimiyyəti ərazisində çalışan qadın işçilər 8 Mart günü maraqlı bir “təbrik”lə qarşılaşıblar. Bayram münasibətilə onlara istirahət və ya diqqət göstərmək əvəzinə, ərazidə kəsilmiş ağacların daşınması kimi ağır iş tapşırılıb.
Görüntülər cəmiyyətdə suallar doğurur: qadınlara verilən dəyər məhz beləmi ifadə olunmalıdır? Əgər bu gün qadınlara hörmət və təşəkkür günü kimi qeyd edilirsə, niyə onlar məhz bayram günündə fiziki cəhətdən ağır işlə məşğul olmalıdırlar?
Bu vəziyyət bir qədər ironik suallar da yaradır. Belə davam edərsə, bəlkə gələn il 8 Mart münasibətilə qadınlara Yeni Günəşliyə asfalt çəkmək də “tapşırılar”? Əlbəttə, bu ifadə istehza kimi səslənir, amma sosial mediada yayılan görüntülər insanlarda məhz belə bir təəssürat yaradır.
Məsələ təkcə ağac daşımaqla məhdudlaşmır. Bu kimi hallar cəmiyyətin qadın əməyinə münasibəti barədə daha geniş müzakirələrə səbəb olur. Qadınlara hörmət yalnız təbrik mesajları və rəsmi çıxışlarla deyil, real davranış və münasibətlə də göstərilməlidir.
Əks halda, bayram təbrikləri ilə real həyat arasındakı ziddiyyət daha çox diqqət çəkəcək.
Foto və məlumat Haldun Novruzzadəyə məxsusdur.