Sosial məsələlərlə bağlı müraciətlər dinlənilib

Neftçala Rayon İcra Hakimiyyətinin başçısı Mirhəsən Seyidov Xanməmmədli və Ramazanlı kəndlərinin sakinləri ilə səyyar qəbul keçirib.

Görüşdə RİH-nin əməkdaşları, hüquq-mühafizə orqanlarının, idarə və müəssisələrin rəhbərləri, şəhid ailələri, müharibə iştirakçıları və kənd ictimaiyyətinin nümayəndələri iştirak ediblər.

Qəbuldan əvvəl Qaçaqkənd kəndində şəhidlərin xatirəsinə yaradılmış kompleks ziyarət edilib.

Görüşdə kəndin sosial-iqtisadi inkişafı, məşğulluq, infrastruktur və abadlıq işləri barədə məlumat verilib. 2026-cı ilin “Şəhərsalma və Memarlıq ili” çərçivəsində rayonda görülən işlər və kənd təsərrüfatının inkişafı ilə bağlı tədbirlər də diqqətə çatdırılıb.

Sakinlər həkim çatışmazlığı, suvarma suyu, bankomatın quraşdırılması, şəkərli diabet xəstələrinin dərman təminatı, evlərin sənədləşdirilməsi və digər məsələlərlə bağlı müraciətlər səsləndiriblər.

Müraciətlərin həlli ilə bağlı aidiyyəti qurumlara tapşırıqlar verilib.

Bildirilib ki, vətəndaşlar RİH-yə müraciətlərini “Rəqəmsal İcra Hakimiyyəti” portalı vasitəsilə də təqdim edə bilərlər.