Şagirdlərin qənnadı məhsulundan istifadə etdiyi bildirilir

Sumqayıt şəhərində məktəblilər arasında zəhərlənmə şübhəsi qeydə alınıb.

Sumqayıt Tibb Mərkəzindən verilən məlumata görə, oktyabrın 2-də saat 10:20 radələrində 14 nəfər zəhərlənmə şübhəsi ilə Uşaq Xəstəxanasının Yoluxucu xəstəliklər şöbəsinə yerləşdirilib.

Hospitalizasiya olunanlardan 11-i oğlan, 3-ü qızdır. Onlara tibbi yardım göstərilib, müalicələri davam etdirilir. Hazırda vəziyyətləri stabil qiymətləndirilir.

Abşeron-Xızı Regional Təhsil İdarəsinin məlumatına əsasən, şagirdlərdən biri evdən gətirdiyi qənnadı məmulatını sinif yoldaşları ilə bölüşüb. Bundan sonra bir neçə şagird özünü pis hiss edib.

Hadisə məktəb rəhbərliyinin nəzarətinə götürülüb. Səbəblərin müəyyənləşdirilməsi üçün aidiyyəti qurumlarla birgə araşdırma aparılır.

AQTA-dan da hadisə ilə bağlı araşdırma aparıldığı bildirilib. Qurumun məlumatına görə, araşdırmanın nəticələri barədə ictimaiyyətə əlavə məlumat veriləcək.

Xatırladaq ki, ötən gün Gəncədə 7 şagird şirniyyatdan zəhərlənmə şübhəsi ilə xəstəxanaya yerləşdirilmişdi.