Hadisə ilə bağlı bir neçə şəxsin saxlanıldığı bildirilir

Pakistanın Lahor şəhərində 23 yaşlı Azərbaycan vətəndaşı Diana Bağıyevanın qrup halında təcavüzə məruz qaldığı bildirilir.

Məlumata əsasən, Diana əvvəllər pakistanlı gənclə ailə qurub. Nikahın sonradan qadının Şabir Əhməd adlı parça taciri ilə münasibətdə olduğu barədə iddialar fonunda pozulduğu bildirilir.

İddialara görə, Şabir Əhməd və onun dostu Tövhid Batta daha sonra Diananı fahişəliyə məcbur ediblər.

Diananın Qusar şəhərindən olduğu bildirilir. O, 2023-cü ildə Bakıda pakistanlı bir gənclə tanış olub. 2024-cü ilin dekabrında onların arasında mübahisə baş verib. Diana həmin şəxsi onu öldürməyə cəhd etməkdə ittiham edərək polisə müraciət edib.

Bundan sonra pakistanlı gənc saxlanılıb, lakin sonradan sərbəst buraxılıb. Tərəflərin daha sonra münasibətlərini davam etdirdiyi və Pakistanda nikaha daxil olduğu bildirilir.

2025-ci ilin mayında Diana həyat yoldaşı ilə birlikdə Pakistana gedib və Feysalabadda yaşayıb. Burada onun Şabir Əhmədlə münasibət qurduğu ehtimal olunur.

Nikah pozulduqdan sonra Diana ilə Şabirin əlaqələrinin davam etdiyi bildirilir. Daha sonra qadın Bakıya qayıdıb.

2026-cı ilin mayında isə maddi çətinliklər səbəbindən yenidən Lahora gedən Diana Şabirin dostu Tövhid Battadan kömək istəyib.

İddialara əsasən, həmin şəxslər Diananı fahişəliyə məcbur ediblər. Daha sonra qadının üç kişi tərəfindən zorlandığı bildirilir.

Diana polisə müraciət edərək hadisədə iştirak etdiyini bildirdiyi şəxslərin adlarını təqdim edib.

Hazırda Pakistan hüquq-mühafizə orqanları tərəfindən hadisə ilə bağlı araşdırma aparılır.