Tanınmış jurnalist, “Xural” Media Qrupunun rəhbəri Əvəz Zeynallı vəfat edib.

Bu barədə vəkil Rəşad Vaqifoğlu sosial şəbəkədə paylaşım edib. 56 yaşlı jurnalist uzun müddətdir onkoloji xəstəlikdən müalicə olunurdu.

Əvəz Zeynallı Azərbaycan mediasında uzun illərdir tanınan, fəaliyyəti ilə həm jurnalistikanın, həm də ölkənin ictimai-siyasi gündəminin diqqət mərkəzində olmuş simalardan biri idi. O, “Xural” qəzetinin və daha sonra “Xural TV”nin rəhbəri kimi fəaliyyət göstərib. Özünəxas sərt üslubu, hakimiyyət və məmurların fəaliyyətinə yönəltdiyi tənqidləri, vətəndaş müraciətlərinə geniş yer verməsi ilə seçilib. Zeynallı 1990-cı illərdən etibarən fəal şəkildə media sahəsində çalışdığını bildirirdi.

Jurnalistin adı müxtəlif illərdə məhkəmə və həbs hadisələri ilə də gündəmə gəlib. 2011-ci ildə Əvəz Zeynallı rüşvət alma ittihamı ilə həbs edilmişdi. Həmin dövrdə onun saxlanılması və istintaq prosesi mediada geniş müzakirə olunmuşdu.

2022-ci il sentyabrın 10-da isə “Xural TV” rəhbəri yenidən həbs edilib. Bu dəfə onun barəsində rüşvət alma, dələduzluq və vəzifəli şəxsin qərarına qanunsuz təsir göstərmə ilə bağlı ittihamlar irəli sürülüb. Zeynallı ittihamları qəbul etməyib və həbsini jurnalist fəaliyyəti ilə əlaqələndirib.

2024-cü il fevralın 26-da Bakı Ağır Cinayətlər Məhkəməsinin hökmü ilə Əvəz Zeynallı 9 il, Elnur Şükürov isə 4 il müddətinə azadlıqdan məhrum edilib. Məhkəmə Zeynallının rüşvət alma ittihamlarının sübuta yetirildiyini açıqlayıb. Zeynallı isə proses zamanı özünü təqsirli bilməyib.

Sonrakı mərhələdə jurnalistin səhhəti ilə bağlı vəziyyət ağırlaşıb. 2025-ci ilin aprelində onun xərçəng xəstəliyindən əziyyət çəkdiyi və xəstəliyi ilə əlaqədar cəzanın çəkilməmiş hissəsindən azad edilməsi üçün məhkəməyə müraciət edildiyi açıqlanmışdı.

Əvəz Zeynallı daha sonra vaxtından əvvəl azadlığa buraxılıb və müalicə üçün uzun müddət Türkiyədə olub.

Onun jurnalist fəaliyyətinin mühüm istiqamətlərindən biri vətəndaşların problemlərinin ictimailəşdirilməsi idi. “Xural TV”də müxtəlif sosial problemlər, məmurların fəaliyyəti, korrupsiya iddiaları və cəmiyyətdə müzakirə doğuran məsələlər gündəmə gətirilirdi. Zeynallı özü də media fəaliyyətini məhz bu xətt üzərində qurduğunu dəfələrlə vurğulayıb.

Onun həbsdə olduğu dövrdə də jurnalistin fəaliyyəti və azad söz məsələsi ətrafında müzakirələr davam edib. Zeynallı məhkəmədə özünü jurnalist kimi təqdim edərək həbsinin onun peşə fəaliyyəti ilə bağlı olduğunu bildirmiş, ittihamları rədd etmişdi. Bu mövqelər onun müdafiəçiləri və tərəfdarları tərəfindən də səsləndirilirdi. Eyni zamanda, məhkəmə hökmündə ittihamların sübuta yetirildiyi bildirilib.

56 yaşında dünyasını dəyişən Əvəz Zeynallının həyatının son illəri jurnalistika, məhkəmə prosesləri, həbs və ağır xəstəliklə mübarizə ilə yadda qaldı.

Jurnalist həmkarlarının, oxucularının və onu illər ərzində izləyən insanların yaddaşında özünəməxsus üslubu və kəskin çıxışları ilə qalacaq.

Allah rəhmət eləsin.