Ermənistanın Xarici Kəşfiyyat Xidmətinin rəhbəri Kristine Qriqoryan Bakıda keçirilən IV Bakı Təhlükəsizlik Forumunda iştirak etdikdən sonra İrəvana qayıdıb.

“NEWS.am” xəbər verir ki, Qriqoryanın olduğu təyyarə sentyabrın 22-də saat 21:40-da İrəvana enməli olsa da, uçuş təxminən iki saat gecikib. Təyyarə yerli vaxtla saat 23:40-da eniş edib. Gecikmənin səbəbi barədə məlumat verilməyib.

Hava limanında erməni jurnalistlər Qriqoryana Bakıda saxlanılan separatçıların geri qaytarılması ilə bağlı məsələnin müzakirə edilib-edilmədiyini soruşublar.

Ermənistanın Xarici Kəşfiyyat Xidmətinin rəhbəri suallara cavab verməyib.

Xatırladaq ki, IV Bakı Təhlükəsizlik Forumu sentyabrın 22-də DTX-nin təşkilatçılığı ilə keçirilib. Tədbirdə 100-dən çox ölkənin xüsusi xidmət orqanlarının rəhbərləri və yüksəkvəzifəli nümayəndələri iştirak edir.