Sərnişin axınının tənzimlənməsi və xətlərin ayrılması layihəsi çərçivəsində “Xocəsən” və “Avtovağzal” metro stansiyalarından istifadə ilə bağlı yeni tətbiq qüvvəyə minir.

“Bakı Metropoliteni” QSC və Azərbaycan Yerüstü Nəqliyyat Agentliyinin (AYNA) birgə məlumatına görə, sentyabrın 23-dən etibarən hər iki stansiyaya giriş müvəqqəti olaraq ödənişsiz olacaq.

Yeni imkan əsasən Sumqayıt, Xırdalan, Bakı–Şamaxı yolu istiqamətindəki yaşayış məntəqələri, həmçinin Abşeron və Qaradağın bəzi ərazilərindən şəhərə daxil olan sərnişinlərin “Şamaxinka” və “20 Yanvar” ərazilərinə getmədən metrodan istifadəsini asanlaşdıracaq.

Sərnişinlər “Xocəsən” və “Avtovağzal” stansiyalarından daxil olaraq “8 Noyabr”, “Dərnəgül”, “Azadlıq prospekti”, “Nəsimi”, “Memar Əcəmi”, “20 Yanvar”, “İnşaatçılar”, “Elmlər Akademiyası” və “Nizami” stansiyalarına qədər ödənişsiz hərəkət edə biləcəklər.

Bundan əlavə, monitorinq və sosial-iqtisadi təhlillərin nəticələrinə əsasən bəzi avtobus marşrutlarının birbaşa “Xocəsən” və “Avtovağzal” stansiyalarına yönləndirilməsi planlaşdırılır.

Qeyd olunan tədbirlərin əsas məqsədi xətlərin ayrılması müddətində sərnişin sıxlığını azaltmaq, alternativ nəqliyyat imkanlarını artırmaq, eləcə də sərnişinlərin vaxt və maliyyə itkilərini minimuma endirməkdir.