Mayın 17–22-də Bakıda keçiriləcək Ümumdünya Şəhərsalma Forumuna (WUF13) hazırlıq işləri davam edir. Bu çərçivədə Azərbaycanın Efiopiyadakı səfirliyi vasitəsilə Efiopiyanın şəhər və infrastruktur naziri Çaltu Sani İbrahim, Əddis-Əbəbə meri Adaneç Abiebie, BMT-nin Afrika üzrə İqtisadi Komissiyasının icraçı katibi Klaver Qeytet, Afrika İttifaqının (Aİ) kənd təsərrüfatı, kənd inkişafı, mavi iqtisadiyyat və dayanıqlı ətraf mühit üzrə komissarı Moses Vilakati və digər rəsmilərlə görüşlər keçirilib.
Görüşlərdə Azərbaycanın Efiopiyadakı səfiri və Aİ yanında daimi nümayəndəsi Ruslan Nəsibov, Azərbaycanın Keniyadakı səfiri və UN-Habitat yanında daimi nümayəndəsi Sultan Hacıyev, eləcə də UN-Habitatın Afrika üzrə regional ofisinin direktoru Oumar Sylla iştirak edib. Forumun mahiyyəti, hazırlıq prosesi, təşəbbüslər, planlaşdırılan tədbirlər və əməkdaşlıq imkanları ətraflı müzakirə olunub.
“Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” mövzusunda keçiriləcək forumun beynəlxalq əməkdaşlığı gücləndirməsi, Azərbaycanın qlobal proseslərdə töhfələrinin təqdim olunması və dayanıqlı şəhər inkişafı sahəsində təcrübəsini paylaşması vurğulanıb. Forum tarixində ilk dəfə dövlət və hökumət başçılarının iştirakı ilə Sammit Zirvə Toplantısı da keçiriləcək.
Görüşlərdə həmçinin Azərbaycanın COP29 və dayanıqlı şəhərsalma sahəsində təcrübələrinin Efiopiyanın COP32-yə ev sahibliyi üçün əhəmiyyəti qeyd olunub və əməkdaşlığa ciddi maraq ifadə edilib.
Azərbaycan nümayəndə heyəti Keniya Hökuməti tərəfindən Əddis-Əbəbədə keçirilən “Şəhər Yoxsulları üçün İqlimə Dayanıqlılığın Yaradılması” (BCRUP) təşəbbüsü üzrə tədbirdə də iştirak edib.