Bakı Şəhəri üzrə Təhsil İdarəsinin (BŞTİ) tabeliyinə yeni verilmiş Nəsimi rayonundakı 355 nömrəli körpələr evi-uşaq bağçası və 357 nömrəli uşaq bağçası fəaliyyətə başlayıb.

Bu barədə BŞTİ-dən məlumat verilib.

Bildirilib ki, hər iki məktəbəqədər təhsil müəssisəsi 4 qruplu olmaqla müasir tələblərə uyğun qurulub. Bağçalar uşaqların hərtərəfli inkişafı, təlim-tərbiyəsinin təşkili üçün zəruri maddi-texniki baza və şəraitlə təmin edilib.

Müəssisələrdə uşaqların rahatlığı və təhlükəsizliyinin təmin olunmasına xüsusi diqqət yetirilib.

Qeyd olunub ki, bağçalara uşaqların qəbulu üçün qeydiyyat elektron sistem vasitəsilə aparılır. Valideynlər bq.edu.az elektron qeydiyyat sistemi üzərindən növbəyə yazıla və müraciət edə bilərlər.

Qeyd edək ki, hər iki məktəbəqədər təhsil müəssisəsi daha əvvəl Daxili İşlər Nazirliyinin tabeliyində fəaliyyət göstərib.