Bakı şəhərinin Nizami rayonunda, C. Naxçıvanski küçəsində yerləşən çoxmərtəbəli yaşayış binasında yanğın olub.

Fövqəladə Hallar Nazirliyindən (FHN) bildirilib ki, hadisə ilə əlaqədar dərhal Dövlət Yanğından Mühafizə Xidmətinin və Bakı Regional Mərkəzinin qüvvələri əraziyə cəlb olunub.

Yanğınsöndürənlərin həyata keçirdiyi zəruri və təxirəsalınmaz tədbirlər nəticəsində doqquzmərtəbəli yaşayış binasının 8-ci mərtəbəsində yerləşən, vətəndaşa məxsus mənzildə baş verən yanğın genişlənməsinə imkan verilmədən qısa müddətdə söndürülüb.

Yanğın nəticəsində ümumi sahəsi 95 kvadratmetr olan dördotaqlı mənzilin mətbəx və eyvanının yanar konstruksiyaları 15 kvadratmetr sahədə yanıb. Mənzilin digər hissələri yanğından mühafizə olunub.

Hadisə nəticəsində xəsarət alan olmayıb.