Formula 1 öncəsi Bakıda yeni tranzit dəhliz istifadəyə veriləcək – istiqamətlər və saatlar

Bakıda Formula 1 günlərində nəqliyyatın hərəkətinin rahatlaşdırılması məqsədilə yeni tranzit dəhliz təşkil ediləcək.

Yeni dəhliz ilk dəfə Üzeyir Hacıbəyli və Puşkin küçələrinin kəsişməsindən Bülbül prospekti istiqamətində fəaliyyət göstərəcək.

Bundan başqa, Qran-Pri günlərində şəhərin mərkəzində bir sıra istiqamətlər üzrə tranzit hərəkət təmin olunacaq.

Hərəkət aşağıdakı istiqamətlər üzrə mümkün olacaq:

• Salyan şossesi – Neftçilər prospekti – Azneft dairəsi;
• M. Lermontov küçəsi – BMT-nin 50 İlliyi küçəsi – İstiqlaliyyət küçəsi;
• Bülbül prospekti – Zərifə Əliyeva küçəsi və Neftçilər prospekti;
• Nizami və Puşkin küçələrinin kəsişməsi – Xəqani küçəsi;
• Ü. Hacıbəyli və Puşkin küçələrinin kəsişməsi – Bülbül prospekti.

Şəhərdən çıxış üçün də müəyyən istiqamətlər açıq saxlanılacaq. Belə ki, Neftçilər prospektindən Bakı Dəniz Limanı, Port Baku Mall və Crescent Mall, İstiqlaliyyət küçəsindən Azərbaycan prospekti, həmçinin Neftçilər prospektindən Azneft dairəsi, Dəniz Mall və Salyan şossesi istiqamətində hərəkət mümkün olacaq.

Tranzit dəhlizlər 21 və 22 sentyabrda səhər 07:00–09:00, axşam 18:00–20:00, 23 sentyabrda isə səhər 07:00–09:00 və axşam 20:00–22:00 arasında açıq olacaq.

Qeyd edək ki, tranzit dəhlizlərin təşkili təcrübəsi Bakıda 2023-cü ildən tətbiq edilir və hər il hərəkət sxemində təkmilləşdirmələr aparılır.

Formula 1 Qatar Airways Azərbaycan Qran-Prisi sentyabrın 24-dən 26-dək Bakıda keçiriləcək.