Xaricdə təhsil xidmətləri göstərən “AİD Group” şirkətinin fəaliyyəti ilə bağlı yeni şikayət ortaya çıxıb.

Paytaxt sakini Rüfət Mikayılov şirkətə ABŞ-də təhsil almaq üçün müraciət etdiyini və 2 min ABŞ dolları ödədiyini bildirib.

Onun sözlərinə görə, ilkin razılaşmadan sonra şirkət tərəfindən təqdim edilən növbəti müqavilədə əvvəlcədən bildirilməyən əlavə şərtlər yer alıb. Şikayətçi xüsusilə viza üçün 850 manat əlavə ödəniş tələb olunmasından narazı qaldığını deyib.

R.Mikayılov müqavilədən imtina etdiyini və ödədiyi vəsaitin geri qaytarılmasını tələb etdiyini bildirib. O, şirkətin “WhatsApp” qrupunda da bununla bağlı müraciət etdiyini söyləyib.

Şikayətçinin iddiasına əsasən, müqavilədən müəyyən müddət ərzində imtina edən müştəriyə ödənişin yarısının qaytarılması nəzərdə tutulsa da, indiyədək ona heç bir vəsait ödənilməyib.

R.Mikayılov məsələ ilə bağlı polisə müraciət etdiyini və prokurorluqda araşdırma aparıldığını bildirib.

O, həmçinin şirkətin ofisində müştərilərdən mobil telefonlarını giriş zamanı təhvil vermələrinin tələb edildiyini iddia edib.

“AİD Group”la bağlı Baş Prokurorluğun İstintaq İdarəsində araşdırmanın davam etdiyi bildirilir. Məlumata görə, iş üzrə bir neçə zərərçəkmiş şəxsin dəymiş ziyanının ödənilməsi təmin olunub.

Məlumatına görə, şirkətin təsisçisi Nigar Fərhad artıq cinayət məsuliyyətinə cəlb edilib. Ona Cinayət Məcəlləsinin 178.3.2-ci və 308-ci maddələri ilə ittiham irəli sürülüb və barəsində “başqa yerə getməmək haqqında iltizam” qətimkan tədbiri seçilib.

İttihamların məhkəmədə təsdiqlənəcəyi halda, N.Fərhadı 5 ildən 10 ilədək azadlıqdan məhrumetmə cəzası gözləyə bilər.

Xatırladaq ki, “AİD Group” təxminən iki ay əvvəl fəaliyyətini dayandırıb. Şirkətin faktiki rəhbəri və Nigar Fərhadın həyat yoldaşı Samir Yəhyazadə DTX tərəfindən həbs edilib.