Azərbaycanda pensiyaların orta aylıq məbləğində artım qeydə alınıb.

Əmək və Əhalinin Sosial Müdafiəsi Nazirliyinin məlumatına görə, sentyabrın 1-nə ölkə üzrə orta aylıq pensiya 596 manat olub. Bu, ötən ilin müvafiq dövrü ilə müqayisədə 10 faiz artım deməkdir.

Yaşa görə orta aylıq pensiyanın məbləği isə 634 manata yüksəlib.

Bildirilib ki, 2026-cı ilin əvvəlindən pensiyalar 9,3 faiz indeksləşdirilərək artırılıb. Yanvar-avqust aylarında pensiya ödənişlərinə 5 milyard 222 milyon manat vəsait sərf olunub. Bu, ötən ilin eyni dövrü ilə müqayisədə 488 milyon manat və ya 10 faiz çoxdur.

Hesabat dövründə 26 min pensiya elektron sistem üzərindən proaktiv qaydada təyin edilib. Ümumilikdə isə elektron pensiya təyinatının tətbiq olunduğu 2019-cu ilin əvvəlindən 205 min pensiya e-sistem vasitəsilə proaktiv şəkildə rəsmiləşdirilib.