Xarici universitetlərdə təhsil alan Azərbaycan vətəndaşları üçün hərbi xidmət müddətinin müəyyənləşdirilməsində əsas şərtlərdən biri diplomun ölkədə tanınmasıdır.

Məlumata görə, Azərbaycan qanunvericiliyində ali təhsilli şəxslər üçün müddətli həqiqi hərbi xidmət müddəti 12 ay, ali təhsili olmayan şəxslər üçün isə 18 ay nəzərdə tutulur.

Xaricdə əldə edilmiş diplomun Azərbaycanda tanınması üçün Təhsildə Keyfiyyət Təminatı Agentliyinə müraciət edilməlidir. Tanınma prosesi zamanı şəxsin aldığı təhsilin forması, universitetin statusu, akkreditasiyası və digər meyarlar qiymətləndirilir.

Diplomun tanınması ilə bağlı mənfi qərar verildikdə və ya vətəndaş müvafiq sənədi təqdim etmədikdə, həmin şəxsin ali təhsil statusu təsdiqlənmir.

Bu səbəbdən xaricdə ali məktəb bitirən, lakin diplomu tanınmayan vətəndaşlar hərbi xidmətə ali təhsili olmayan çağırışçılar üçün nəzərdə tutulan qaydada cəlb oluna bilərlər.

Əyani təhsil alan şəxslərə verilən möhlət hüququ isə yalnız təhsil dövrünü əhatə edir. Təhsil başa çatdıqdan sonra hərbi xidmət məsələsi ümumi qaydada həll edilir.